સુરતથી દિવાળી અને છઠ પૂજા માટે ઘરે જનારા કારીગરોની મુશ્કેલી વધી, સ્પેશિયલ ટ્રેનોમાં પણ બુકિંગ ખુલતાંની સાથે સીટો ફુલ

સુરત: દિવાળી અને છઠ પૂજાની રજાઓને ધ્યાનમાં રાખીને પશ્ચિમ રેલવેએ તાજેતરમાં કેટલીક સ્પેશિયલ ટ્રેનોના ફેરા વધારવાની જાહેરાત કરી હતી, પરંતુ આ તમામ ટ્રેનોમાં બુકિંગ ખુલતાંની સાથે જ સીટો ફુલ થઈ ગઈ છે. ઉધનાથી જયનગર, પટના, સુબેદારગંજ, ધનબાદ સહિત વિવિધ ગંતવ્યો માટે ચલાવવામાં આવેલી હોલી-ડે સ્પેશિયલ ટ્રેનોના દ્વિતીય એસી, તૃતીય એસી અને સ્લીપર ક્લાસમાં લાંબી વેઈટિંગ હોવાથી યાત્રીઓની મુશ્કેલી ઘટી નથી.  સુરત સહિત દક્ષિણ ગુજરાતમાં રહેતા પ્રવાસીઓ, જેઓ દિવાળી અને છઠ જેવા મોટા તહેવારો દરમિયાન પૂર્વી ઉત્તર પ્રદેશ, બિહાર અને ઝારખંડ જવા ઈચ્છે છે, તેમને કન્ફર્મ ટિકિટ મેળવવામાં ઘણી મુશ્કેલી પડી રહી છે. રેગ્યુલર ટ્રેનોનું બુકિંગ ઘણા સમય પહેલાં જ ફુલ થઈ ચૂક્યું હતું. આ પછી, પશ્ચિમ રેલવેએ યાત્રીઓને રાહત આપવા માટે 15 જોડી સ્પેશિયલ ટ્રેનોના ફેરા ડિસેમ્બર સુધી વધાર્યા હતા, પરંતુ હવે સ્થિતિ એવી છે કે આ સ્પેશિયલ ટ્રેનોનું બુકિંગ પણ માત્ર ચાર દિવસમાં હાઉસફુલ થઈ ગયું છે. 

સૂત્રોએ જણાવ્યું કે 09031 ઉધના-જયનગર એક્સપ્રેસના દ્વિતીય શ્રેણી શયનયાનમાં 12 ઓક્ટોબરે 87, 19 ઓક્ટોબરે 187 અને 26 ઓક્ટોબરે 27 વેઈટિંગ છે. 09045 ઉધના-પટના એક્સપ્રેસના સ્લીપર શ્રેણીમાં 10 ઓક્ટોબરે 38, 17 ઓક્ટોબરે 188 અને 24 ઓક્ટોબરે 151 વેઈટિંગ છે. 04156 ઉધના-સુબેદારગંજ એક્સપ્રેસના સ્લીપર શ્રેણીમાં 14 ઓક્ટોબરે 67, 21 ઓક્ટોબરે 69 અને 28 ઓક્ટોબરે RAC 102 છે.

09117 ઉધના-સુબેદારગંજ એક્સપ્રેસમાં 17 ઓક્ટોબરે 187 અને 24 ઓક્ટોબરે 111 વેઈટિંગ છે. 09059 ઉધના-ખુર્દા રોડ એક્સપ્રેસમાં 15 ઓક્ટોબરે 131 અને 22 ઓક્ટોબરે 66 વેઈટિંગ છે. 09039 ઉધના-ધનબાદ એક્સપ્રેસના સ્લીપર શ્રેણીમાં 17 ઓક્ટોબરે 295 અને 24 ઓક્ટોબરે 156 વેઈટિંગ છે. 09025 વલસાડ-દાનાપુર એક્સપ્રેસના સ્લીપર શ્રેણીમાં 13 ઓક્ટોબરે 104, 20 ઓક્ટોબરે સ્લીપરમાં 172, તૃતીય એસીમાં 108 અને દ્વિતીય એસીમાં 20 વેઈટિંગ છે. 09007 વલસાડ-ખાતીપુરા એક્સપ્રેસના સ્લીપર શ્રેણીમાં 16 ઓક્ટોબરે 41, 23 ઓક્ટોબરે 46 અને તૃતીય એસી તથા દ્વિતીય એસીમાં પણ વેઈટિંગ છે. 09075 મુંબઈ-કાઠગોદામ એક્સપ્રેસમાં 10થી 29 ઓક્ટોબર સુધી લાંબી વેઈટિંગ છે.