Gujarat: ગુજરાતમાં છેલ્લા ઘણા સમયથી બેવડી ઋતુની અસર જોવા મળી રહી છે. ત્યારે છેલ્લા બે દિવસથી આકરી ગરમી પડી રહી છે. હવામાન વિભાગના જણાવ્યા અનુસાર, એક તરફ ઉત્તર-પશ્ચિમ ભારત અને પશ્ચિમ હિમાલયના વિવિધ ભાગોમાં વરસાદની સંભાવના છે તો બીજી તરફ ગુજરાતમાં હીટવેવની સંભાવના છે. હવામાન વિભાગનું કહેવું છે કે ગુજરાતના વિવિધ ભાગોમાં ચાર દિવસ સુધી તીવ્ર ગરમીનું મોજું રહેશે. આ અંગે યલો એલર્ટ જાહેર કરવામાં આવ્યું છે. 9 થી 12 માર્ચ દરમિયાન દક્ષિણ ગુજરાત વિસ્તાર અને સૌરાષ્ટ્ર-કચ્છના દરિયાકાંઠાના વિસ્તારોમાં ગરમ અને ભેજવાળી હવાના કારણે અસ્વસ્થતાની શક્યતા છે.
હવામાન વિભાગે આગામી 4 દિવસ દરમિયાન મહત્તમ અને લઘુત્તમ તાપમાનમાં 2 થી 3 ડિગ્રી સેલ્સિયસનો વધારો થવાની આગાહી કરી છે. આગામી 3 થી 4 દિવસ દરમિયાન સૌરાષ્ટ્ર અને કચ્છના આંતરિક ભાગો અને ઉત્તર ગુજરાત પ્રદેશના આજુબાજુના ભાગો અને દક્ષિણ ગુજરાત પ્રદેશના ભાગોમાં મહત્તમ તાપમાન 40 થી 42 ડિગ્રી સેલ્સિયસની વચ્ચે નોંધાય તેવી શક્યતા છે. હવામાન વિભાગે આ ભાગોમાં ત્રણથી ચાર દિવસ ગરમીનું મોજું રહેવાની આગાહી કરી છે.
IMD એ 9 માર્ચે સૌરાષ્ટ્ર અને કચ્છના સુરેન્દ્રનગર, રાજકોટ, અમરેલી અને કચ્છ જિલ્લાઓમાં અલગ-અલગ સ્થળોએ હીટ વેવની આગાહી કરી છે. આ અંગે યલો એલર્ટ પણ જારી કરવામાં આવ્યું છે. બનાસકાંઠા, સાબરકાંઠા, ગાંધીનગર અમદાવાદ, સુરત, સુરેન્દ્રનગર, રાજકોટ, જૂનાગઢ, અમરેલી, ભાવનગર, બોટાદ, કચ્છ, વલસાડ અને દમણ જિલ્લાના અલગ-અલગ ભાગોમાં 10 માર્ચે હીટ વેવની સ્થિતિ વધુ તીવ્ર બને તેવી શક્યતા છે. હવામાન વિભાગે આ વિસ્તારો માટે યલો એલર્ટ જાહેર કર્યું છે.
હવામાન વિભાગે ચેતવણી આપી છે કે 11મી માર્ચે બનાસકાંઠા, સાબરકાંઠા, ગાંધીનગર, અમદાવાદ, વડોદરા, સુરત, સુરેન્દ્રનગર, રાજકોટ, જૂનાગઢ, અમરેલી, ભાવનગર, બોટાદ, કચ્છ અને વલસાડ જિલ્લાના વિવિધ ભાગોમાં હીટ વેવની સ્થિતિ પ્રવર્તે તેવી શક્યતા છે. 12મી માર્ચે બનાસકાંઠા, ગાંધીનગર, અમદાવાદ, વડોદરા, રાજકોટ, અમરેલી અને ભાવનગર જિલ્લામાં અલગ-અલગ સ્થળોએ હીટ વેવની શક્યતા છે. આ બંને દિવસો માટે યલો એલર્ટ પણ જારી કરવામાં આવ્યું છે. એકંદરે ગુજરાતમાં ચાર દિવસ સુધી તીવ્ર ગરમીનું મોજું રહેવાની શક્યતા છે.