Gujaratની ઝાંખી સતત ત્રીજા વર્ષે લોકોની પસંદ બની, સૌથી વધુ મતો સાથે પોપ્યુલર ચોઈસ કેટેગરીમાં આવી સર્વશ્રેષ્ઠ

દિલ્હીમાં પ્રજાસત્તાક દિવસની રાષ્ટ્રીય પરેડના ડ્યુટી પથ પર રજૂ કરાયેલ Gujaratની ટેબ્લોએ પોપ્યુલર ચોઈસ કેટેગરીમાં પ્રથમ સ્થાન મેળવ્યું હતું. ગુજરાત: આનર્તપુરથી એકતા નગર સુધી – વારસા અને વિકાસના અદ્ભુત સંગમને આ કેટેગરીમાં સૌથી વધુ મત મળ્યા છે. આ રીતે, ગુજરાતના ટેબ્લોએ સતત ત્રીજા વર્ષે આ કેટેગરીમાં પ્રથમ સ્થાન મેળવીને જીતની હેટ્રિક નોંધાવી છે. મુખ્યમંત્રી ભૂપેન્દ્ર પટેલે આ સિદ્ધિ બદલ લોકોનો આભાર વ્યક્ત કર્યો હતો.

તેમણે વ્યકત કર્યું હતું કે ગુજરાત જનભાગીદારી દ્વારા વડાપ્રધાનના વિકાસ અને વારસાના મંત્રને સાકાર કરી રહ્યું છે અને ભવિષ્યમાં પણ અગ્રેસર રહેશે.

પ્રજાસત્તાક દિવસની પરેડમાં વિવિધ રાજ્યો અને સરકારી મંત્રાલયો અને વિભાગોની 31 ઝાંખીઓ રજૂ કરવામાં આવી હતી. ગુજરાતના માહિતી વિભાગ દ્વારા રજૂ કરાયેલા ટેબ્લોમાં ગુજરાતના આધુનિક વિકાસની ગાથા તેની પ્રાચીન વારસાની સાથે રજૂ કરવામાં આવી હતી. ઓનલાઈન વોટીંગ દ્વારા પોપ્યુલર ચોઈસ કેટેગરીની શ્રેષ્ઠ ટેબ્લોની પસંદગી કરવામાં આવી હતી, જેમાં ગુજરાતના ટેબ્લોને લોકો તરફથી સૌથી વધુ વોટ મળ્યા હતા.