Gujarat: ઉદયપુર: ગુજરાતના લોકપ્રિય ગરબા નૃત્યને યુનેસ્કો દ્વારા માનવતાના “અમૂર્ત સાંસ્કૃતિક વારસા” તરીકે માન્યતા મળ્યા બાદ હવે ગુજરાત પ્રવાસન નિગમે એક નવતર પહેલ હાથ ધરી છે. ગુજરાતની સમૃદ્ધ સાંસ્કૃતિક પરંપરાને રાજસ્થાન સુધી પહોંચાડવા માટે 14 સપ્ટેમ્બર, 2025ના રોજ સાંજે 7:30 કલાકે ઉદયપુરના ફિલ્ડ ક્લબ ખાતે “વાઇબ્રન્ટ ગુજરાત પ્રી-નવરાત્રી ફેસ્ટિવલ 2025”નું પ્રથમવાર ભવ્ય આયોજન કરવામાં આવ્યું છે. આ કાર્યક્રમમાં ગુજરાત અને રાજસ્થાન વચ્ચે સાંસ્કૃતિક જોડાણ મજબૂત બને તેવા પ્રયાસો હાથ ધરાયા છે.
ગરબા સાથે સાંસ્કૃતિક ઊર્જાનો અનુભવ
આ ભવ્ય ઉત્સવ દરમિયાન પ્રસિદ્ધ ગાયક પાર્થિવ ગોહિલનું લાઈવ પરફોર્મન્સ યોજાશે. સાથે જ ગુજરાતી લોકનૃત્યના વિવિધ સ્વરૂપો જેમ કે તલવાર રાસ, ગોફ ગૂંથણ અને મણિયારો રાસ જેવા પરંપરાગત નૃત્યો દ્વારા અનન્ય સાંસ્કૃતિક ઊર્જાનો અનુભવ કરવાની તક મળશે. ગરબાની લય અને તાલ સાથે જોડાઈ દરેક સહભાગી ગુજરાતની સંસ્કૃતિ સાથે આત્મીયતા અનુભવી શકશે.
શરદપૂનમની રાત્રે દિલ્હી ખાતે ખાસ કાર્યક્રમ
આ ઉપરાંત, નવરાત્રી બાદ ‘શરદપૂનમ’ની રાત્રે દિલ્હી ખાતે ખાસ ગરબા મહોત્સવનું પણ આયોજન થશે. ગુજરાતની સાંસ્કૃતિક પરંપરા માત્ર રાજસ્થાન સુધી મર્યાદિત ન રહી દેશના અન્ય શહેરોમાં પણ પહોંચે તે માટે રાજ્ય સરકાર અને ગુજરાત પ્રવાસન નિગમે આગળનું આયોજન પણ શરૂ કર્યું છે.
નિઃશુલ્ક ગરબા વર્કશોપ – તૈયારી માટે ખાસ તક
આ ઉત્સવને ધ્યાનમાં રાખીને 8 થી 13 સપ્ટેમ્બર સુધી ઉદયપુરના JCA ડાન્સ એન્ડ સ્પોર્ટ્સ ફિટનેસ હબ ખાતે નિઃશુલ્ક ગરબા વર્કશોપનું આયોજન કરવામાં આવ્યું છે. સવારે 10થી બપોરે 1 અને સાંજે 7થી રાત્રે 11 સુધી યોજાતા આ વર્કશોપ દરમિયાન સ્થાનિકો તેમજ મુલાકાતીઓને ગરબાની લય, તાલ અને ભાવના શીખવાની અનોખી તક મળશે. ગુજરાત ટુરિઝમે જણાવ્યા મુજબ, આ વર્કશોપનું ઉદ્દેશ્ય ગરબા સાથે જોડાણ ઊંડું કરવાનું છે અને સહભાગીઓને પરંપરાગત નૃત્યના તાલીમ દ્વારા ઉત્સવ માટે તૈયાર કરવાનું છે. વધુ માહિતી માટે મો. 63581 44611 ઉપર સંપર્ક કરી શકાશે.
સાંસ્કૃતિક સેતુ બને તેવો કાર્યક્રમ
ગુજરાત પ્રવાસનના પ્રવક્તાએ જણાવ્યું કે, “આ કાર્યક્રમ ગુજરાત અને રાજસ્થાન વચ્ચે એક સાંસ્કૃતિક સેતુ બનશે. ગરબા માત્ર નૃત્ય નથી, પણ એ આપણા સંસ્કૃતિના ભાવ, પરંપરા અને સામૂહિક ઉત્સવનો અનોખો અનુભવ છે.” તેમણે સૌ નાગરિકોને જાહેર આમંત્રણ પાઠવી આ કાર્યક્રમમાં જોડાઈ ગુજરાતની સાંસ્કૃતિક વારસાને માણવા માટે આવકાર્યું.
પરંપરાગત પોશાક ફરજિયાત, પ્રવેશ નિઃશુલ્ક
આ ઉત્સવ દરમિયાન દરેક સહભાગી માટે પરંપરાગત પોશાક પહેરવો ફરજિયાત રહેશે. નૃત્યના તાલે ઝૂમનારા અનુભવી નૃત્યકારોથી લઈને પહેલી વાર ગરબા શીખી રહ્યા હોય તેવા ખેલૈયાઓ માટે પણ વિશેષ આયોજન કરવામાં આવ્યું છે. પ્રવેશ સંપૂર્ણપણે નિઃશુલ્ક રહેશે જેથી દરેક વર્ગના લોકો સાંસ્કૃતિક કાર્યક્રમનો આનંદ લઈ શકે.
આકર્ષક ઈનામો અને ગુજરાતની હસ્તકલા
ઉત્સવ દરમિયાન શ્રેષ્ઠ પરંપરાગત પોશાક, શ્રેષ્ઠ ગરબા પ્રદર્શન અને શ્રેષ્ઠ ખેલૈયાઓ માટે વિવિધ કેટેગરીમાં રૂ. 5000 સુધીના આકર્ષક વાઉચર ઈનામો જાહેર કરવામાં આવ્યા છે. ઉપરાંત, ગુજરાતના સાંસ્કૃતિક વારસાની ઝલક આપતી હસ્તકલા પ્રદર્શનો તેમજ પરંપરાગત ગુજરાતીના વ્યંજનોનો સ્વાદ માણવાની પણ ખાસ તક આપવામાં આવશે. તેથી આ કાર્યક્રમ માત્ર નૃત્ય સુધી મર્યાદિત ન રહી સમગ્ર સાંસ્કૃતિક અનુભવ બની રહેશે.
સાંસ્કૃતિક પ્રવાસન માટે નવી દિશા
આ પહેલ ગુજરાત અને રાજસ્થાન વચ્ચે સાંસ્કૃતિક પ્રવાસનને પ્રોત્સાહિત કરશે તેમજ બંને રાજ્યોના નાગરિકોને એકબીજાની પરંપરા વિશે વધુ જાણવાની તક આપશે. ગુજરાતના લોક નૃત્ય ગરબાના તાલે દેશના વિવિધ ભાગો સુધી પોતાની ઓળખ પહોંચાડવી એ ગુજરાત પ્રવાસન માટે એક ઐતિહાસિક પગલું સાબિત થશે.
આ રીતે, “વાઇબ્રન્ટ ગુજરાત પ્રી-નવરાત્રી ફેસ્ટિવલ 2025” માત્ર એક નૃત્ય કાર્યક્રમ નહીં પણ ગુજરાતની સંસ્કૃતિને દેશભરમાં પ્રસરાવતી એક અનોખી પહેલ બની રહેશે. ગરબાના તાલે જોડાયેલા દરેક સહભાગી માટે આ ઉત્સવ સાંસ્કૃતિક ગૌરવ અને સામૂહિક ઉત્સવનો યાદગાર પ્રસંગ સાબિત થશે.
આ પણ વાંચો
- Bangladesh: પાકિસ્તાનના પગલે ચાલીને બાંગ્લાદેશ IMF પાસેથી 30 અબજ ડોલરની મદદ માંગી રહ્યું છે
- Israel: જેરુસલેમમાં ધોળા દિવસે ગોળીબાર, 6 ઇઝરાયલી નાગરિકોના મોત
- Jammu: જમ્મુમાં પાકિસ્તાની ઘૂસણખોર પકડાયો, અભિનેત્રી અવનીત કૌરને મળવા માટે સરહદ પાર કરવાનો પ્રયાસ
- Trump: ટેરિફ બાદ અમેરિકાએ ભારતને વધુ એક ઝટકો આપ્યો, વિઝા અંગે તણાવ વધ્યો
- Rajkot: હેલ્મેટ અંગે સ્પેશિયલ ડ્રાઈવ શરૂ થતા વાહનચાલકોમાં રોષ, “ખાડાઓ દૂર કરો, પછી નિયમ લાગુ કરો”