ગુજરાત: BJPના MLA પર દલિત મહિલા પર દુષ્કર્મ આચર્યા મામલે FIR દાખલ, હાઈકોર્ટના આદેશ પર થઇ કાર્યવાહી

Gujaratમાં સત્તારૂઢ ભારતીય જનતા પાર્ટી (BJP)ના ધારાસભ્ય વિરુદ્ધ શનિવારે એક દલિત મહિલા પર બળાત્કાર અને ગુનાહિત ધમકી આપવા બદલ FIR નોંધવામાં આવી છે. ગુજરાત હાઈકોર્ટની સૂચનાથી પોલીસે આ કાર્યવાહી કરી છે.

એફઆઈઆર મુજબ, આરોપી, ગુજરાતના ભૂતપૂર્વ મંત્રી અને ભાજપના વર્તમાન ધારાસભ્ય ગજેન્દ્ર સિંહ પરમાર પર પણ અનુસૂચિત જાતિ અને જનજાતિ (અત્યાચાર નિવારણ) અધિનિયમની જોગવાઈઓ હેઠળ કેસ દાખલ કરવામાં આવ્યો છે કારણ કે પીડિતા દલિત છે. કથિત ઘટના જુલાઈ 2020માં બની હતી.

ગાંધીનગરના સેક્ટર 21 પોલીસ સ્ટેશનમાં ભારતીય દંડ સંહિતા (IPC) ની કલમ 376 (દુષ્કર્મની સજા) અને 506 (ગુનાહિત ધમકી માટેની સજા) હેઠળ કેસ નોંધવામાં આવ્યો છે.

થોડા દિવસો પહેલા ગુજરાત હાઈકોર્ટે ધારાસભ્ય ગજેન્દ્રસિંહ પરમાર સામે પીડિત મહિલાની ફરિયાદ પર એફઆઈઆર ન નોંધવા બદલ ગુજરાત પોલીસને સવાલ કર્યો હતો. પરમાર સાબરકાંઠા જિલ્લાની પ્રાંતિજ વિધાનસભા બેઠક પરથી ભાજપના ધારાસભ્ય છે.

ફરિયાદી મહિલાના જણાવ્યા મુજબ, ધારાસભ્ય પરમારે તેને 30 જુલાઈ 2020ના રોજ ધારાસભ્યના ઘરે બોલાવી હતી અને લગ્નના બહાને તેની સાથે શારીરિક સંબંધો બાંધ્યા હતા.

એફઆઈઆર મુજબ પીડિતાએ જણાવ્યું કે ધારાસભ્યએ બાદમાં તેના ફોન કોલ્સને પણ નજરઅંદાજ કરવાનું શરૂ કર્યું. પીડિતાએ આરોપ લગાવ્યો કે એકવાર ધારાસભ્યએ તેનો ફોન ઉપાડ્યો અને જાતિવાદી ટિપ્પણી કરી અને તેને ધમકી આપી કે જો તે આ અંગે કોઈને પણ વાત કરશે તો તે તેનું અપહરણ કરશે અને તેને હેરાન કરશે.

આ પછી, મહિલાએ 2021 માં હાઈકોર્ટનો સંપર્ક કર્યો અને પોલીસને ધારાસભ્ય વિરુદ્ધ એફઆઈઆર નોંધવા માટે નિર્દેશ આપવા વિનંતી કરી.