Gandhinagar: છોકરીઓનું વોટ્સએપ હેક કરીને પરિવાર પાસેથી કરતો પૈસાની માંગણી, 100થી વધુ લોકો બન્યા છેતરપિંડીનો ભોગ

Gandhinagar: ગુજરાતના ગાંધીનગરથી સાયબર ફ્રોડનો એક વિચિત્ર કિસ્સો સામે આવ્યો છે. જ્યાં અભ્યાસ કરતી યુવતીઓનું વોટ્સએપ હેક કરીને મિત્રો અને સગા-સંબંધીઓ પાસેથી ફી ભરવા માટે આર્થિક મદદ માંગવાની છેતરપિંડી ઝડપાઈ છે. પ્રારંભિક તપાસમાં 100થી વધુ છોકરીઓ સાયબર ફ્રોડનો શિકાર બની છે.

પોલીસે સાયબર ફ્રોડના આરોપીની ધરપકડ કરી હતી
સ્ટેટ સાયબર ક્રાઈમમાં હેલ્પલાઈન નંબર 1930 પર એક યુવતીએ નોંધાવેલી ફરિયાદના આધારે મધ્યપ્રદેશના એક નાના ગામમાંથી એક યુવકની ધરપકડ કરવામાં આવી છે. ખરેખર, આ છેતરપિંડી કરનારે અભ્યાસ કરતી યુવતીનું વોટ્સએપ હેક કર્યું હતું અને તેની ફીમાં મદદ કરવાના નામે તેના સંબંધીઓ પાસેથી પૈસા માંગ્યા હતા. આ રીતે 100થી વધુ યુવતીઓને છેતરવામાં આવી હોવાની પ્રાથમિક માહિતી સામે આવી છે. આ કેસમાં પોલીસે મધ્યપ્રદેશના અનુપપુર જિલ્લાના બદરા ગામમાંથી પ્રભાત કુમાર છોટાલાલ ગુપ્તા નામના આરોપીની ધરપકડ કરી છે.

પોલીસે તપાસ શરૂ કરી
તપાસ દરમિયાન એસબીઆઈનો એક મોબાઈલ નંબર અને બેંક એકાઉન્ટ નંબર મળી આવ્યો હતો, જેમાં ફીના નામે છેતરપિંડી કરીને લેવામાં આવેલા પૈસા ટ્રાન્સફર કરવામાં આવ્યા હતા. રાજ્ય સાયબર સેલની ટીમ હવે આ મામલાની તપાસમાં લાગેલી છે કે આરોપીએ શાળા-કોલેજોમાં ભણતી યુવતીઓ અને મહિલાઓના નંબર ક્યાંથી મેળવ્યા અને તે કેવી રીતે વોટ્સએપ હેક કરતો હતો.

ડિજિટલ યુગમાં ગુનાઓ વધી રહ્યા છે
ગાંધીનગર CID સાયબર સેલના અધિકારી ધર્મેન્દ્ર શર્માએ જણાવ્યું હતું કે, આજના ડીજીટલ યુગમાં સાયબર ગુનાઓ ઝડપથી વધી રહ્યા છે. સાયબર ગુનેગારો ગુના કરવા માટે તમારી સોશિયલ મીડિયા માહિતીનો ઉપયોગ કરે છે. તાજેતરમાં એક યુવતીનું વોટ્સએપ હેક કરીને તેના મિત્રો અને સંબંધીઓ પાસેથી પૈસાની માંગણી કરવામાં આવી હતી. આરોપીએ તેના બેંક ખાતામાં પૈસા ટ્રાન્સફર કર્યા હતા. અમે આરોપીની ધરપકડ કરી છે. અમે આ મામલે એફઆઈઆર નોંધીને તપાસ શરૂ કરી છે.