Gandhinagar: રાજ્ય સરકારનો મોટો નિર્ણય, જાહેર સાહસોના ‘એબ્સોર્બ’ કર્મચારીઓને હવે મળશે રૂ. 9,000 લઘુતમ પેન્શન

Gandhinagar: રાજ્ય સરકારના જાહેર સાહસો, બોર્ડ અને કોર્પોરેશનમાં કાયમી ધોરણે સમાવિષ્ટ થયેલા કર્મચારીઓ માટે ગુજરાત સરકારે એક મહત્વપૂર્ણ નિર્ણય લીધો છે. નાણા વિભાગે બહાર પાડેલા નવા ઠરાવ અનુસાર, આ તમામ કર્મચારીઓને સાતમા પગારપંચ મુજબ માસિક લઘુતમ પેન્શન રૂપિયા 9,000 ચૂકવવાની જોગવાઈ કરવામાં આવી છે. આ નિર્ણયનો અમલ 1 ઓક્ટોબર 2025થી કરવામાં આવશે.

રાજ્ય સરકાર તરફથી રાહતનો શ્વાસ

લાંબા સમયથી પેન્શન બાબતે ફરિયાદો કરી રહેલા કર્મચારીઓને આ ઠરાવથી મોટી રાહત મળી છે. નાણા વિભાગ દ્વારા જાહેર કરાયેલા ઠરાવમાં જણાવાયું છે કે રાજ્ય સરકારમાંથી જાહેર સાહસોમાં કાયમી ધોરણે સમાવિષ્ટ થયેલા કર્મચારીઓને સાતમા પગારપંચ મુજબ પેન્શન ચૂકવવા અંગેની બાબત સરકારે ગંભીરતાપૂર્વક વિચારણા હેઠળ લીધી હતી. રાજ્ય સરકારના અન્ય પેન્શનરોને પહેલાથી જ સાતમા પગારપંચના લાભો મળી રહ્યા હતા, પરંતુ ‘એબ્સોર્બ’ થયેલા પેન્શનરો માટે અલગથી આદેશ જારી કરવાનું બાકી હતું. હવે તે ખામી પૂરી કરવામાં આવી છે.

રજૂઆતો અને કેન્દ્ર સરકારની નીતિને ધ્યાને લીધું

વિભાગીય ઠરાવમાં જણાવાયું છે કે વિવિધ કર્મચારી મંડળો તરફથી મળેલી રજૂઆતોને ધ્યાનમાં લેવામાં આવી હતી. સાથે જ ભારત સરકારે પોતાના કર્મચારીઓ માટે સમાન પ્રકારની જોગવાઈઓ કરી હોવાને કારણે રાજ્ય સરકારે પણ આ મુદ્દે પગલું ભર્યું છે. અત્યાર સુધી કેટલાક ‘એબ્સોર્બ’ થયેલા કર્મચારીઓ 9,000 કરતાં ઓછી રકમ પેન્શન તરીકે મેળવી રહ્યા હતા, જે તેમના જીવનનિર્વાહ માટે પૂરતી નહોતી. આથી તેમને લઘુતમ પેન્શનની ગેરંટી આપવાનો નિર્ણય લેવામાં આવ્યો છે.

કઈ રીતે થશે અમલ?

સરકારના ઠરાવ મુજબ, જે કર્મચારીઓ રાજ્ય સરકારની સેવામાંથી જાહેર સાહસો, બોર્ડ કે કોર્પોરેશનમાં કાયમી રીતે સમાવિષ્ટ થયા છે અને સાતમા પગારપંચ લાગુ થયા બાદ પણ માસિક રૂ. 9,000 કરતાં ઓછું પેન્શન મેળવી રહ્યા છે, તે તમામને હવે રૂ. 9,000ની લઘુતમ પેન્શન ચૂકવવામાં આવશે. આ લાભ 1 ઓક્ટોબર 2025થી રોકડમાં મળશે. તે પહેલાંના સમયગાળા માટે આ લાભ માત્ર નોશનલ (કાગળ પરની ગણતરી) ગણાશે, એટલે કે પાછલા સમય માટે કોઈ આર્થિક લાભ નહીં આપવામાં આવે.

કેન્દ્ર સરકારમાં પહેલેથી જ અમલ

અત્રે ઉલ્લેખનીય છે કે, કેન્દ્ર સરકારના પેન્શન નિયમો હેઠળ પણ આવી જ જોગવાઈ અમલમાં છે. જ્યારે કોઈ કેન્દ્રીય કર્મચારીને જાહેર હિતમાં બોર્ડ કે નિગમમાં કાયમી રૂપે સ્થાનાંતરિત કરવામાં આવે છે, ત્યારે તેમની અગાઉની સેવા પેન્શન માટે પાત્ર ગણવામાં આવે છે. જો તેઓ પેન્શન માટે જરૂરી લાયકાત ધરાવતા હોય, તો નિવૃત્તિ બાદ તેમને માસિક પેન્શન, ગ્રેચ્યુઇટી અને અન્ય લાભો મળવાપાત્ર હોય છે. ગુજરાત સરકારે હવે એ જ નીતિને રાજ્ય સ્તરે અમલમાં મૂકી છે.

કર્મચારી વર્ગમાં આનંદ

આ ઠરાવ બાદ કર્મચારી વર્ગમાં ખુશીની લાગણી જોવા મળી રહી છે. અનેક નિવૃત્ત કર્મચારીઓ લાંબા સમયથી ઓછા પેન્શનથી જીવન ચલાવવા મજબૂર હતા. ખાસ કરીને મોંઘવારીના સમયમાં 9,000થી ઓછી રકમમાં ઘરનું બજેટ ચલાવવું મુશ્કેલ બની ગયું હતું. હવે લઘુતમ પેન્શન 9,000 નક્કી થતાં તેમને થોડી આર્થિક સુરક્ષા મળશે. કર્મચારી મંડળોએ આ નિર્ણયને સ્વાગત આપ્યું છે અને જણાવ્યું છે કે સરકાર તરફથી આ એક યોગ્ય અને લોકહિતમાં ભરાયેલું પગલું છે.

સરકારની પ્રતિબદ્ધતા

રાજ્ય સરકારે જણાવ્યું છે કે પેન્શનરોના હિતોની રક્ષા કરવી તેની પ્રતિબદ્ધતા છે. જાહેર સાહસો, બોર્ડ અને કોર્પોરેશનમાં સેવારત રહીને રાજ્યના વિકાસમાં યોગદાન આપનાર કર્મચારીઓને યોગ્ય સન્માન અને સુરક્ષા આપવી સરકારનું કર્તવ્ય છે. લઘુતમ પેન્શનનો આ નિર્ણય એ જ દિશામાં એક મહત્વપૂર્ણ કડી છે. આ ઠરાવ અમલમાં આવતાં રાજ્યના હજારો કર્મચારીઓ અને તેમના પરિવારોને સીધો લાભ મળશે.

આ પણ વાંચો

• આણંદ જિલ્લાના તારાપુરના રિંઝામાં 110 કરોડના ખર્ચે સાબરમતી નદી પર બ્રિજનું નિર્માણ કરાશે: CM Bhupendra Patel
• કન્સ્ટ્રક્શનમાં ‘મેડ ઇન ઇન્ડિયા’નો સૂર અને ઇમારતોમાં ભારતની વિરાસત તેમજ સંસ્કારો ઝળકાવીએ – CM Bhupendra Patel
• Horoscope: બધી 12 રાશિઓ માટે કેવો રહેશે આજનો દિવસ, જાણો આજનું રાશિફળ
• PM Modi અને પ્રિયંકા ગાંધી હસતા અને વાતો કરતા જોવા મળ્યા, જાણો આ મુલાકાત ક્યાં થઈ
• Tamil Nadu માં SIR ડેટા જાહેર, 9.7 મિલિયન મતદારોને દૂર કરવામાં આવ્યા; મતદારોની કુલ સંખ્યા જાણો