તમારી લાગણીઓને અહીં લાવશો નહીં; SC તરફથી Mahatma Gandhi ના પૌત્રને ઝાટકો, સાબરમતી આશ્રમની અરજી ફગાવી

Mahatma Gandhiના પૌત્ર તુષાર ગાંધીને SC તરફથી મોટો ઝટકો લાગ્યો છે. કોર્ટે તેમની અરજી ફગાવી દીધી છે જેમાં તેમણે અમદાવાદ સ્થિત સાબરમતી આશ્રમના રિડેવલપમેન્ટ પ્રોજેક્ટને પડકાર્યો હતો. હકીકતમાં, આ કેસમાં તેમણે ગુજરાત હાઈકોર્ટના આદેશને પડકાર્યો હતો જેમાં સાબરમતી આશ્રમના આશરે રૂ. 1,200 કરોડના ખર્ચે પુનઃવિકાસ કરવાના રાજ્ય સરકારના નિર્ણયને યથાવત રાખવામાં આવ્યો હતો.

આ કેસની સુનાવણી કરતા જસ્ટિસ એમએમ સુંદરેશ અને જસ્ટિસ રાજેશ બિંદલની ખંડપીઠે આ અરજી ફગાવી દીધી હતી અને કહ્યું હતું કે ગુજરાત હાઈકોર્ટના આદેશ બાદ આ અરજી દાખલ કરવામાં બે વર્ષનો વિલંબ થયો છે. આવી સ્થિતિમાં તેને ધ્યાનમાં લઈ શકાય નહીં.

અહેવાલ મુજબ કોર્ટે સરકારની નીતિમાં દખલ કરવાનો ઈન્કાર કર્યો અને કહ્યું, તમારી લાગણીઓને અહીં ન લાવો. આપણે આગળ વધી રહ્યા છીએ, દેશ આગળ વધી રહ્યો છે. વસ્તુઓ જોવાની એક રીત છે. કોર્ટે એમ પણ કહ્યું કે અમે આ મામલાની તપાસ કરી અને અમને કંઈ મળ્યું નથી.

અહેવાલ મુજબ અરજીને ફગાવી દેતા કોર્ટે એમ પણ કહ્યું છે કે ગુજરાત સરકારે પહેલાથી જ સ્પષ્ટ કરી દીધું છે કે આશ્રમના પાંચ એકરનો મુખ્ય વિસ્તાર પુનઃવિકાસના દાયરામાં લાવવામાં આવશે નહીં. આવી સ્થિતિમાં મુખ્ય વિસ્તારને લઈને અરજીમાં જે આશંકા વ્યક્ત કરવામાં આવી છે તે અરજી પર વિચાર કરવા માટે પૂરતી નથી.

ગુજરાત હાઈકોર્ટમાં તુષાર ગાંધીની શું દલીલ હતી?

તુષાર ગાંધીએ ગુજરાત હાઈકોર્ટ સામેની તેમની અરજીમાં દલીલ કરી હતી કે પ્રસ્તાવિત પ્રોજેક્ટથી આશ્રમની ટોપોગ્રાફી બદલાઈ જશે. આ પ્રોજેક્ટમાં 40 થી વધુ ઇમારતોની ઓળખ કરવામાં આવી છે જે સાચવવામાં આવશે જ્યારે બાકીની લગભગ 200 નો નાશ અથવા પુનઃનિર્માણ કરવામાં આવશે. એમ પિટિશનમાં જણાવાયું હતું.

ગુજરાત હાઈકોર્ટે 2022 માં ગાંધીની અરજીનો નિકાલ કર્યો હતો જ્યારે સરકારે કહ્યું હતું કે આશ્રમના મુખ્ય વિસ્તારને અસર થશે નહીં. સાબરમતી આશ્રમને ગાંધી આશ્રમ તરીકે પણ ઓળખવામાં આવે છે. તેની સ્થાપના 1917માં અમદાવાદમાં મહાત્મા ગાંધી દ્વારા કરવામાં આવી હતી.