જ્યોતિષપીઠના શંકરાચાર્ય અવિમુક્તેશ્વરાનંદ સરસ્વતી ગાયને ‘રાષ્ટ્રની માતા’ જાહેર કરવા અભિયાન ચલાવી રહ્યા છે. શંકરાચાર્ય તેમના દેશવ્યાપી અભિયાનના ભાગરૂપે બુધવારે અમદાવાદ પહોંચ્યા હતા. ટાઈમ્સ ઓફ ઈન્ડિયાના અહેવાલ મુજબ ગુજરાતમાં વિશ્વ હિન્દુ પરિષદની સાથે Congress પાર્ટીએ પણ આ અભિયાનને સમર્થન આપ્યું છે. જો કે ભાજપ તરફથી હજુ સુધી આ અંગે કોઈ પ્રતિક્રિયા આવી નથી.
સોલા ભાગવત વિદ્યાપીઠ ખાતે એક વિશાળ કાર્યક્રમનું આયોજન કરવામાં આવ્યું હતું, જેમાં મોટી સંખ્યામાં સંતો-મુનિઓએ હાજરી આપી હતી. કોંગ્રેસ પાર્ટીના ઘણા નેતાઓએ પણ ભાગ લીધો અને પોતાનું સમર્થન જાહેર કર્યું. કોંગ્રેસ વિધાયક દળના નેતા અમિત ચાવડાએ કહ્યું કે તેમનો પક્ષ ગાયને ‘રાષ્ટ્રમાતા’ જાહેર કરવાની અવિમુક્તેશ્વરાનંદ સરસ્વતીની માંગને સમર્થન આપે છે. પક્ષ દ્વારા જારી કરાયેલા નિવેદનમાં ચાવડાને ટાંકવામાં આવ્યું હતું કે રાજ્ય એકમ આ માંગને સમર્થન આપે છે અને આગામી વિધાનસભા સત્રમાં દરખાસ્ત લાવશે.
બનાસકાંઠાના સાંસદ ગેની ઠાકોરે જણાવ્યું હતું કે લોકસભા ચૂંટણી પ્રચાર દરમિયાન તેમણે વચન આપ્યું હતું કે જો તેઓ જીતશે તો ગાયને રાષ્ટ્ર માતા જાહેર કરવા સંસદમાં અપીલ કરશે. ઠાકોરે પણ શંકરાચાર્યની માંગને સમર્થન આપ્યું છે. ગુજરાતના કોંગ્રેસના એકમાત્ર લોકસભા સાંસદે પણ આ માંગ સંસદમાં ઉઠાવી હતી. ગાયના દૂધનું છાણનું મહત્વ જણાવતા તેમણે લોકસભામાં કહ્યું હતું કે ગાયો પર થતા અત્યાચાર બંધ થવો જોઈએ. આ દરમિયાન તેમણે શંકરાચાર્ય અવિમુક્તેશ્વરાનંદનો પણ ઉલ્લેખ કર્યો હતો.