Chhota Udaipur: ગુજરાતના છોટા ઉદેપુર જિલ્લામાંથી એક ચોંકાવનારો કિસ્સો પ્રકાશમાં આવ્યો છે. સંખેડા તાલુકામાં એક મહિલાએ કથિત રીતે તેની આઠ મહિનાની પુત્રીની હત્યા કરી હતી. ત્યારબાદ તેણે ફાંસી લગાવીને આત્મહત્યા કરી હતી. ગુરુવારે એક પોલીસ અધિકારીએ આ ઘટનાની માહિતી આપી હતી.
પુત્રીની હત્યા બાદ આત્મહત્યા
એક પોલીસ અધિકારીએ જણાવ્યું હતું કે, “પીપલસાટ ગામની રહેવાસી સંગીતા ભીલે બુધવારે તેના ઘર પાસેના ખુલ્લા ટાંકીમાં તેની આઠ મહિનાની પુત્રીને ડૂબાડી દીધી હતી. તેનો પતિ ગિરીશ દૂધ ખરીદવા ગયો હતો. જ્યારે તે પાછો ફર્યો ત્યારે તેણે જોયું કે તેની પુત્રી ડૂબી ગઈ હતી અને સંગીતા ગુમ થઈ ગઈ હતી.” અધિકારીએ ઉમેર્યું હતું કે, “તેમને સંગીતાનો મૃતદેહ તેમના ઘરથી લગભગ 150 મીટર દૂર એક ઝાડ પર લટકતો મળ્યો હતો.”
ભાગીને કર્યા લગ્ન
અધિકારીના જણાવ્યા અનુસાર, “ગિરીશના પિતાએ પોલીસને આપેલી ફરિયાદમાં દાવો કર્યો હતો કે કૌટુંબિક વિવાદને કારણે સંગીતા તણાવમાં હતી અને તેને ડર હતો કે તેના માતાપિતા તેને ગિરીશથી દૂર લઈ જશે. બંને ભાગી ગયા હતા અને લગ્ન કરી લીધા હતા.” અધિકારીએ જણાવ્યું હતું કે આ કેસની તપાસ ચાલુ છે અને પોસ્ટમોર્ટમ રિપોર્ટની રાહ જોવાઈ રહી છે.
રાજકોટમાં મહિલાની હત્યા
ગુજરાતના રાજકોટમાં બીજી એક ઘટનામાં, 33 વર્ષીય મહિલા પર તેના ઘર નજીક અજાણ્યા વ્યક્તિઓ દ્વારા ક્રૂર હુમલો કરવામાં આવ્યો હતો. આ ઘટનામાં તેનું મોત નીપજ્યું હતું. એક અધિકારીએ જણાવ્યું હતું કે પીડિતા, સ્નેહા આસોદિયા, શનિવારે સાંજે ભગવતીપરા વિસ્તારમાં આવેલા તેના ઘરેથી નજીકના રેસ્ટોરન્ટમાં જવા માટે નીકળી હતી અને પાછી ફરી ન હતી.
સહાયક પોલીસ કમિશનર બી.વી. જાધવે જણાવ્યું હતું કે, “રવિવારે સવારે બી ડિવિઝન પોલીસ સ્ટેશન વિસ્તારમાં તેના ઘર નજીક એક નિર્જન ગલીમાં તેનો મૃતદેહ મળી આવ્યો હતો.” તેમણે કહ્યું કે તેના પર તીક્ષ્ણ હથિયારથી ક્રૂર હુમલો કરવામાં આવ્યો હતો અને તેના ચહેરા અને માથા પર ઈજાઓ હતી. પોલીસના જણાવ્યા અનુસાર, પીડિતાએ તેના પતિ હિતેશ આસોદિયાને કહ્યું હતું કે તે પાણીપુરી ખાવા માટે બહાર જઈ રહી છે, પરંતુ પાછી આવી નહીં.