RCB જીતતાની સાથે જ નરેન્દ્ર મોદી સ્ટેડિયમ રોશનીથી ઝગમગી ઉઠ્યું, જીતની ખુશીમાં Virat Kohliની આંખમાં આવ્યા આંસુ
RCB Win 2025 IPL: મંગળવારે ગુજરાતના અમદાવાદ સ્થિત નરેન્દ્ર મોદી સ્ટેડિયમ ખાતે રમાયેલી IPLની ફાઇનલ મેચમાં રોયલ ચેલેન્જર્સ બેંગ્લોરે કિંગ્સ ઇલેવન પંજાબને 6 રનથી હરાવ્યું. આ મેચમાં બેંગ્લોરના 190 રનના જવાબમાં પંજાબની ટીમે સંપૂર્ણ તાકાતથી સ્કોરનો પીછો કર્યો પરંતુ કુલ 184 રન જ બનાવી શકી. મેચ પછી, નરેન્દ્ર મોદી સ્ટેડિયમ પ્રકાશથી ઝળહરતું હતું અને આતશબાજીના અદભુત દ્રશ્યો જોવા મળ્યા. આટલી લાંબી રાહ જોયા પછી પહેલી IPL ટ્રોફી જીતવાની ખુશીમાં વિરાટ કોહલીની આંખો ભીની થઈ ગઈ.
ફાઇનલ મેચ કેવી રહી?
ઇન્ડિયન પ્રીમિયર લીગ (IPL) 2025 ની ફાઇનલમાં રજત પાટીદારના નેતૃત્વમાં રોયલ ચેલેન્જર્સ બેંગ્લોરે (RCB) પંજાબ કિંગ્સને 6 રનથી હરાવીને પ્રથમ વખત ટાઇટલ જીત્યું. નરેન્દ્ર મોદી સ્ટેડિયમ ખાતે રમાયેલી આ રોમાંચક મેચમાં, RCB એ પહેલા બેટિંગ કરતા 20 ઓવરમાં 9 વિકેટ ગુમાવીને 190 રન બનાવ્યા. જવાબમાં, પંજાબ કિંગ્સ 20 ઓવરમાં 7 વિકેટ ગુમાવીને માત્ર 184 રન જ બનાવી શક્યું અને પ્રથમ ટ્રોફી જીતવાનું તેમનું સ્વપ્ન અધૂરું રહ્યું. છેલ્લી ઓવરમાં 22 રન બનાવવા છતાં ટીમ મેચ જીતી શકી નહીં.
કૃણાલની 4 ઓવર પંજાબ કિંગ્સ માટે મોંઘી સાબિત થઈ
191 રનના લક્ષ્યાંકનો પીછો કરતા, પંજાબ કિંગ્સે સારી શરૂઆત કરી, જ્યાં ઓપનિંગ જોડીએ 43 રનની ભાગીદારી કરી. પરંતુ પ્રિયાંશ આર્ય (24) ના આઉટ થયા પછી, કૃણાલ પંડ્યાએ તેની 4 ઓવરમાં અદ્ભુત પ્રદર્શન કર્યું. તેણે પ્રભસિમરન સિંહ (72 રન પર આઉટ) ને પેવેલિયન મોકલીને પંજાબની ઇનિંગ્સને આંચકો આપ્યો. આ પછી, જોશ ઇંગ્લિશ અને શ્રેયસ ઐયર (1 રન) પણ વહેલા આઉટ થઈ ગયા. કૃણાલની શાનદાર બોલિંગે પંજાબને વાપસી કરવાની તક આપી ન હતી, અને RCB એ પંજાબને 184 રન પર રોકીને ઐતિહાસિક જીત મેળવી.
નરેન્દ્ર મોદી સ્ટેડિયમમાં શું ખાસ છે?
નરેન્દ્ર મોદી સ્ટેડિયમ વિશ્વનું સૌથી મોટું ક્રિકેટ સ્ટેડિયમ છે. પહેલા તે મોટેરા સ્ટેડિયમ તરીકે જાણીતું હતું, પરંતુ 2021 માં તેનું નામ બદલીને વડા પ્રધાન નરેન્દ્ર મોદી રાખવામાં આવ્યું. સ્ટેડિયમમાં 1,32,000 લોકોની બેઠક ક્ષમતા છે. તે અત્યાધુનિક સુવિધાઓથી સજ્જ છે, જેમાં ચાર ડ્રેસિંગ રૂમ, 11 સેન્ટર પીચ અને બે પ્રેક્ટિસ ગ્રાઉન્ડનો સમાવેશ થાય છે. સ્ટેડિયમમાં LED લાઇટિંગ અને ઉત્તમ ડ્રેનેજ સિસ્ટમ છે. તે 2023 વર્લ્ડ કપ ફાઇનલ સહિત IPL, ટેસ્ટ અને ODI મેચોનું આયોજન કરે છે.