Gujarat High Courtમાં સુનાવણી દરમિયાન એક સગીર દુસ્કર્મ પીડિતાએ બાળકીને જન્મ આપ્યો; રાજ્ય સરકાર ઉઠાવશે છ મહિના સુધી તેનો ખર્ચ

Gujarat High Court News: ગુજરાત હાઈકોર્ટમાં ચાલી રહેલી સુનાવણી દરમિયાન અમદાવાદની 15 વર્ષીય બળાત્કાર પીડિતાએ એક બાળકીને જન્મ આપ્યો. પીડિતાના પિતાએ 35 અઠવાડિયાના ગર્ભનો ગર્ભપાત કરવાની પરવાનગી માંગતી અરજી દાખલ કરી હતી. સુનાવણી દરમિયાન સગીરાને પ્રસૂતિ પીડા થઈ અને 28 ઓક્ટોબરે તેણે બાળકીને જન્મ આપ્યો ત્યારે મામલો વધુ સંવેદનશીલ બન્યો.

કેસની સુનાવણી કરતા ન્યાયાધીશ સમીર દવેની આગેવાની હેઠળની બેન્ચે જાહેર કર્યું કે ગર્ભપાતની માંગણી કરતી અરજી હવે “નિષ્ક્રિય” છે કારણ કે સગીરાએ જન્મ આપ્યો હતો. કોર્ટે રાજ્ય સરકારને સગીરા અને નવજાત શિશુ માટે ડિલિવરી અને આગામી છ મહિનાનો તમામ ખર્ચ ઉઠાવવાનો નિર્દેશ આપ્યો.

અમદાવાદની સોલા સિવિલ હોસ્પિટલમાં કોર્ટના આદેશ પર સગીરાનું તબીબી પરીક્ષણ કરવામાં આવ્યું. રિપોર્ટમાં જણાવાયું હતું કે ગર્ભાવસ્થા 35 અઠવાડિયા અને 3 દિવસની હતી. સગીરાને 25 ઓક્ટોબરે દાખલ કરવામાં આવી હતી અને 28 ઓક્ટોબરે બપોરે 2.2 કિલોગ્રામ વજનની સ્વસ્થ બાળકીને જન્મ આપ્યો હતો.

બંને માટે સંભાળ અને નિયમિત આરોગ્ય તપાસના આદેશો

કોર્ટે નિર્દેશ આપ્યો હતો કે સગીર અને બાળક બંનેની યોગ્ય રીતે સંભાળ રાખવામાં આવે અને તેમના સ્વાસ્થ્યનું નિયમિત નિરીક્ષણ કરવામાં આવે. જો સગીર બાળકને દત્તક લેવા માંગતી હોય, તો આ પ્રક્રિયા અમદાવાદમાં માન્ય એજન્સી દ્વારા હાથ ધરવામાં આવે.

બાળ કલ્યાણ સમિતિને દેખરેખ રાખવાની જવાબદારી સોંપવામાં આવી છે. જો સગીર તેના પરિવાર સાથે રહેવા માંગતી નથી, તો તેને મહિલા આશ્રયસ્થાનમાં રાખવામાં આવશે અને તેના શિક્ષણ અને વ્યાવસાયિક તાલીમ માટે વ્યવસ્થા કરવામાં આવશે.

બાળક માટે વચગાળાનું વળતર નક્કી કરવાનો નિર્દેશ

ઉપરાંત, જિલ્લા કાનૂની સેવા સત્તામંડળને બાળક માટે વચગાળાનું વળતર નક્કી કરવાનો અને સમગ્ર પુનર્વસન પ્રક્રિયા પર નજર રાખવાનો આદેશ આપવામાં આવ્યો છે. કોર્ટે એ પણ નિર્દેશ આપ્યો હતો કે પીડિતાને જરૂરી માનસિક અને સામાજિક સહાય મળે તેની ખાતરી કરવામાં આવે જેથી તે સામાન્ય જીવનમાં પાછી ફરી શકે.