Ahmedabad: રામોલ પોલીસે 50 લાખ રૂપિયાની રોકડ સાથે કરી બે લોકોની ધરપકડ, CTM વિસ્તારમાં ચેકિંગ દરમિયાન ઝડપાયા

Ahmedabad News: શહેરના રામોલ પોલીસ સ્ટેશનની પોલીસે CTM એક્સપ્રેસ વે પર વાહન ચેકિંગ દરમિયાન ₹50 લાખની બિનહિસાબી રોકડ સાથે બે શખ્સોની ધરપકડ કરી હતી. તેઓ સંતોષકારક જવાબ આપી શક્યા ન હતા. આવકવેરા વિભાગને રોકડ રકમની જાણ કરવામાં આવી છે. બંને હાલમાં જામીન પર છે.

પીએસઆઈ આરબી રબારીએ જણાવ્યું હતું કે ધરપકડ કરાયેલા બે શખ્સો મૂળ ઉત્તર પ્રદેશના છે. એક દીપક કુમાર કશ્યપ (32) અને બીજો રવિ કુમાર લોઢા (35) છે. બંને હાલમાં ગ્રેટર નોઈડામાં રહે છે અને બાઇક ટેક્સી ચલાવે છે. વાહન ચેકિંગ દરમિયાન, બસમાં મુસાફરી કરી રહેલા બે શખ્સો પાસેથી ₹50 લાખ રોકડ મળી આવી હતી.

તેઓ મુંબઈથી રોકડ રકમ લાવ્યા હતા

પૂછપરછ દરમિયાન તેઓએ ખુલાસો કર્યો કે તેઓ સરિતા ચૌહાણ નામની મહિલા પાસેથી મુંબઈથી લાવ્યા હતા અને તેને જયપુર પહોંચાડવાના હતા, જેમાં તેઓ સારું કમિશન કમાતા હતા. તેઓ સરિતાની ટિકિટનો ઉપયોગ કરીને દિલ્હીથી મુંબઈ આવ્યા હતા અને બસ દ્વારા જયપુર પાછા ફરી રહ્યા હતા.