Ahmedabad: સ્વેટર કેસમાં ખાનગી શાળાઓની મનમાની સામે NSUI દ્વારા થયેલા હોબાળા બાદ, DEOએ તપાસની ખાતરી આપી

Ahmedabad: વાલીઓએ ફરિયાદ કરી છે કે અમદાવાદ શહેરની ઘણી ખાનગી શાળાઓ વાલીઓ પર સ્વેટર અને યુનિફોર્મ ખરીદવા માટે દબાણ કરી રહી છે. આ મામલે આજે વિદ્યાર્થી સંગઠન NSUIએ આ મુદ્દે જોરદાર વિરોધ પ્રદર્શન કર્યું હતુ. NSUIના કાર્યકરો અમદાવાદ DEOની ઓફિસે પહોંચ્યા હતા. જ્યાં સૂત્રોચ્ચાર કર્યા અને ખાનગી શાળાઓને આ પ્રથા બંધ કરવાની માંગ કરી હતી.

વિરોધ પ્રદર્શન દરમિયાન, NSUIના નેતાઓએ આરોપ લગાવ્યો કે, અમદાવાદમાં ખાનગી શાળાઓ વાલીઓને ચોક્કસ દુકાન કે સ્થળેથી મોંઘા સ્વેટર ખરીદવા માટે દબાણ કરી રહી છે. આ મુદ્દો અગાઉ પણ અનેક વખત ઉઠાવવામાં આવ્યો છે, પરંતુ વહીવટીતંત્રે શાળાઓ સામે કોઈ કડક પગલાં લીધા નથી. વાલીઓ પર આ નાણાકીય બોજ હોવા છતાં, શિક્ષણ વિભાગ મૌન છે.

NSUI ના વિરોધ અને અરજીનો જવાબ આપતા, અમદાવાદ જિલ્લા શિક્ષણ અધિકારી રોહિત ચૌધરીએ જણાવ્યું હતું કે શિક્ષણ વિભાગ હંમેશા વિદ્યાર્થીઓની ચિંતાઓ પ્રત્યે સતર્ક છે. પુસ્તકો હોય કે સ્વેટર, જો કોઈ કારણોસર વાલીઓને હેરાન કરવામાં આવી રહ્યા હોય, તો તેની તપાસ કરવામાં આવશે. વિદ્યાર્થી સંગઠન દ્વારા મળેલા મેમોરેન્ડમને ગંભીરતાથી લેવામાં આવ્યું છે, અને વાલીઓ તરફથી નાની ફરિયાદોને ધ્યાનમાં લઈને યોગ્ય કાર્યવાહી કરવામાં આવશે.