કાલથી શરૂ થઈ રહ્યું છે સંસદ સત્ર, પહેલા દિવસે PM Modi-કેબિનેટ મંત્રીઓ સહિત 280 સાંસદો લેશે શપથ

PM modi; પીએમ મોદી અને તેમના મંત્રીઓ બાદ રાજ્યવાર સાંસદોને અંગ્રેજી મૂળાક્ષરો અનુસાર શપથ લેવડાવવામાં આવશે. આ રીતે પહેલા આસામના સાંસદો અને છેલ્લે પશ્ચિમ બંગાળના સાંસદો શપથ લેશે.

આવતીકાલથી 18મી લોકસભાનું પ્રથમ સત્ર શરૂ થઈ રહ્યું છે. જ્યારે લોકસભાની કાર્યવાહી સવારે 11 વાગ્યે શરૂ થશે, ત્યારે વડા પ્રધાન નરેન્દ્ર મોદી અને તેમના કેબિનેટ મંત્રીઓ સાંસદ તરીકે શપથ લેનાર પ્રથમ હશે. પ્રોટેમ સ્પીકર ભર્તૃહરિ મહતાબ તેમને શપથ લેવડાવશે. આ પછી નવા ચૂંટાયેલા સાંસદોને શપથ લેવડાવવામાં આવશે. પીએમ મોદી બાદ રાજનાથ સિંહ, અમિત શાહ અને નીતિન ગડકરી શપથ લેશે. તે પછી મંત્રી પરિષદના અન્ય સભ્યો સાંસદ તરીકે શપથ લેશે.

તમને જણાવી દઈએ કે પીએમ મોદીની કેબિનેટમાં સામેલ મંત્રીઓમાં 58 લોકસભાના સભ્યો છે. કેન્દ્રીય મંત્રી પરિષદના 13 સભ્યો રાજ્યસભાના સાંસદ છે અને એક મંત્રી, રવનીત સિંહ બિટ્ટુ કોઈપણ ગૃહના સભ્ય નથી. તેઓ ભાજપની ટિકિટ પર લુધિયાણાથી લોકસભા ચૂંટણી લડ્યા હતા, પરંતુ હારી ગયા હતા. પીએમ મોદી અને તેમના મંત્રીઓ બાદ રાજ્યવાર સાંસદોને અંગ્રેજી મૂળાક્ષરો અનુસાર શપથ લેવડાવવામાં આવશે. સંસદના આ સત્રમાં ઝીરો અવર અને પ્રશ્નકાળ નહીં હોય.

27 જૂને રાષ્ટ્રપતિ દ્રૌપદી મુર્મુનું સંબોધન

આ રીતે પહેલા આસામના સાંસદો અને છેલ્લે પશ્ચિમ બંગાળના સાંસદો શપથ લેશે. 24 જૂને સંસદ સત્રના પહેલા દિવસે 280 નવા ચૂંટાયેલા સાંસદો શપથ લેશે. બીજા દિવસે એટલે કે 25મી જૂને 264 નવા ચૂંટાયેલા સાંસદો શપથ લેશે. આ પછી 26મી જૂને લોકસભા અધ્યક્ષની ચૂંટણી યોજાશે. રાષ્ટ્રપતિ દ્રૌપદી મુર્મુ 27 જૂને બંને ગૃહોની સંયુક્ત બેઠકને સંબોધિત કરશે. 28 જૂને, સરકાર રાષ્ટ્રપતિના સંબોધન પર ચર્ચા કરવાનો પ્રયાસ કરશે, જોકે વિપક્ષ તાજેતરના NEET પેપર લીક પર હોબાળો મચાવી શકે છે.

PM મોદી 2 જુલાઈએ લોકસભામાં બોલશે

રાષ્ટ્રપતિના અભિભાષણના જવાબમાં વડાપ્રધાન નરેન્દ્ર મોદી 2 જુલાઈએ લોકસભાને સંબોધિત કરશે. તેઓ 3 જુલાઈએ રાજ્યસભામાં બોલશે. કેન્દ્રીય સંસદીય બાબતોના પ્રધાન કિરેન રિજિજુએ 20 જૂનના રોજ જણાવ્યું હતું કે રાષ્ટ્રપતિ દ્રૌપદી મુર્મુએ કટક, ઓડિશાના બીજેપી સાંસદ ભર્તૃહરિ મહતાબને પ્રોટેમ સ્પીકર તરીકે નિયુક્ત કર્યા છે. રાષ્ટ્રપતિએ સ્પીકરની ચૂંટણી સુધી પ્રોટેમ સ્પીકરને મદદ કરવા માટે સુરેશ કોડીકુનીલ, થલીકોટ્ટાઈ રાજુતેવર બાલુ, રાધા મોહન સિંહ, ફગ્ગન સિંહ કુલસ્તે અને સુદીપ બંદોપાધ્યાયની પણ નિમણૂક કરી છે.

સૂત્રોનું માનીએ તો સંસદના નીચલા ગૃહ એટલે કે લોકસભામાં ભાજપને સ્પીકરનું પદ મળવાની શક્યતા છે, જ્યારે ડેપ્યુટી સ્પીકરનું પદ એનડીએના સહયોગીમાંથી કોઈ એકને આપવામાં આવી શકે છે. I.N.D.I.A. બ્લોકે ડેપ્યુટી સ્પીકર પદની માંગણી કરી છે, જે પરંપરાગત રીતે હંમેશા વિપક્ષ પાસે જાય છે. જોકે, 17મી લોકસભામાં કોઈ ડેપ્યુટી સ્પીકર નહોતા. જો કે, ભાજપની આગેવાની હેઠળના એનડીએ અને કોંગ્રેસના નેતૃત્વવાળા ઈન્ડિયા બ્લોક બંનેએ સ્પીકર અને ડેપ્યુટી સ્પીકર પદ માટેના ઉમેદવારોના નામની જાહેરાત કરી નથી.