sonakshi sinha: બોલિવૂડ અભિનેત્રી સોનાક્ષી સિંહાની મોર્ફ કરેલી તસવીરો સોશિયલ મીડિયા પર ફેલાવવાના કેસમાં એક મહત્વપૂર્ણ અપડેટ સામે આવ્યું છે. મુંબઈની બાંદ્રા કોર્ટે આરોપી આર્યન દીપક જૈનને મુક્ત કરવાનો આદેશ આપ્યો છે, જેની આ મામલે દિલ્હીમાં ધરપકડ કરવામાં આવી હતી.
કોર્ટે આ ધરપકડને ગેરકાયદેસર ગણાવી છે. કોર્ટે જણાવ્યું કે, આરોપીને દિલ્હીથી મુંબઈ લાવતી વખતે પોલીસે ફરજિયાત કાયદાકીય પ્રક્રિયાઓનું પાલન કર્યું ન હતું. સોનાક્ષી સિંહા દ્વારા ફરિયાદ નોંધાવ્યા બાદ, મુંબઈના બાંદ્રા પોલીસ સ્ટેશનમાં આ કેસ દાખલ કરવામાં આવ્યો હતો.
પોલીસે કસ્ટડી (રિમાન્ડ) માંગી હતી
પોલીસે શનિવારે સવારે લગભગ ૧૦:૧૧ વાગ્યે દિલ્હીના શાહદરા વિસ્તારમાં આવેલા જગતપુરી પોલીસ સ્ટેશનના અધિકારક્ષેત્રમાંથી આર્યન દીપક જૈનની ધરપકડ કરી હતી. ત્યારબાદ તેને મુંબઈ લાવવામાં આવ્યો અને બાંદ્રા કોર્ટમાં મેજિસ્ટ્રેટ સમક્ષ રજૂ કરવામાં આવ્યો.
અભિનેત્રીની મોર્ફ કરેલી, નગ્ન તસવીરો બનાવવા માટે કયા ઈલેક્ટ્રોનિક ઉપકરણ કે માધ્યમનો ઉપયોગ કરવામાં આવ્યો હતો, તે જાણવા માટે પોલીસે આરોપીની ત્રણ દિવસની કસ્ટડી માંગી હતી. આ ઉપરાંત, પોલીસ આ કેસમાં વધુ તપાસ કરવા માંગતી હતી.
કોર્ટે તેને મુક્ત કરવાનો આદેશ કેમ આપ્યો?
મેજિસ્ટ્રેટે પોલીસની માંગણી ફગાવી દીધી અને આરોપીને મુક્ત કરવાનો આદેશ આપ્યો. કોર્ટે નોંધ્યું કે, આરોપીને મુંબઈ લાવતા પહેલા પોલીસે તેને દિલ્હીમાં સ્થાનિક મેજિસ્ટ્રેટ સમક્ષ રજૂ કર્યો ન હતો. કોર્ટના મતે, પોલીસે જરૂરી કાયદાકીય પ્રક્રિયાઓને બાજુ પર મૂકીને આરોપીને સીધો બાંદ્રા કોર્ટમાં રજૂ કર્યો હતો.
સુનાવણી દરમિયાન, આરોપીના વકીલો – અમન શાહી, પ્રશાંત ત્રિવેદી અને આદિત્ય જૈને – પોલીસની કસ્ટડીની માંગણીનો વિરોધ કર્યો હતો. બચાવ પક્ષે દલીલ કરી કે પોલીસે ધરપકડ પહેલાં જરૂરી નોટિસ આપી ન હતી, કે આરોપીને તેની ધરપકડના કારણો વિશે પણ જાણ કરી ન હતી. વકીલોએ ધ્યાન દોર્યું કે, આરોપીને સ્થાનિક મેજિસ્ટ્રેટ સમક્ષ રજૂ કર્યા વિના જ દિલ્હીથી મુંબઈ લઈ આવવામાં આવ્યો હતો. બચાવ પક્ષે એવી દલીલ પણ કરી કે, ફરિયાદી એક પ્રભાવશાળી વ્યક્તિ હોવાથી પોલીસે ઉતાવળમાં આ કાર્યવાહી કરી છે. આક્ષેપોને નકારતા, આરોપીએ જણાવ્યું કે તેણે કોઈ ગુનો કર્યો નથી અને આ કેસમાં જે કાયદાકીય કલમો લગાવવામાં આવી છે તે, ઓછામાં ઓછું પ્રથમ દૃષ્ટિએ તો, લાગુ પડતી નથી.




