VHPના વિરોધ બાદ Gujarat સરકારની કાર્યવાહી, દિવાળી મેગેઝિનમાંથી કવિ અઝીઝ ટંકારવીની કવિતા હટાવાઈ
Gujarat VHP protests: વિશ્વ હિન્દુ પરિષદના વાંધાને પગલે ગુજરાત સરકારે તેના વાર્ષિક દિવાળી પ્રકાશનના ઓનલાઈન સંસ્કરણમાંથી એક કવિતા દૂર કરી છે. વિશ્વ હિન્દુ પરિષદે આરોપ લગાવ્યો હતો કે કવિતામાં ભગવાન રામ અને ભક્ત સંત મીરા બાઈ વિશે વાંધાજનક ટિપ્પણીઓ હતી. સરકારે કવિ અઝીઝ ટંકારવીની કવિતા દૂર કરી અને તેના સ્થાને કવિ પ્રકાશ ‘જલાલ’ની કવિતા મૂકી.
રાજ્યનો માહિતી અને પ્રસારણ વિભાગ દર વર્ષે દિવાળી નિમિત્તે મેગેઝિન પ્રકાશિત કરે છે. મેગેઝિનના ઓનલાઈન સંસ્કરણ ‘ગુજરાત દીપોત્સવ અંક’માં કવિ અઝીઝ ટંકારવીની એક કવિતા હતી, જેનો વિશ્વ હિન્દુ પરિષદે વાંધો ઉઠાવ્યો હતો. હવે તેને દૂર કરીને કવિ પ્રકાશ ‘જલાલ’ની ‘જોયે’ નામની કવિતા મૂકી દેવામાં આવી છે.
વિશ્વ હિન્દુ પરિષદે મુખ્યમંત્રી ભૂપેન્દ્ર પટેલને પત્ર લખીને માંગ કરી હતી કે કવિતા તાત્કાલિક દૂર કરવામાં આવે. VHPએ કવિતાના લેખક અને તેને મંજૂરી આપનારા અધિકારીઓ સામે કાર્યવાહી કરવાની માંગ કરી હતી. VHPએ જણાવ્યું હતું કે સરકારી પ્રકાશનમાં આવી કૃતિનો સમાવેશ ચિંતાજનક છે, કારણ કે દિવાળી 14 વર્ષના વનવાસ પછી ભગવાન રામના અયોધ્યા પરત ફરવા સાથે સંકળાયેલી છે.
ગુજરાત વીએચપી પ્રવક્તા હિતેન્દ્રસિંહ રાજપૂતે જણાવ્યું હતું કે ટંકારવીની કવિતા દૂર કરવામાં આવી છે. વીએચપીના નેતાઓએ આ કાર્યવાહી પર ખુશી વ્યક્ત કરી હતી. તેમણે કહ્યું હતું કે, “અમને ખુશી છે કે રાજ્ય સરકારે અમારી વિનંતી પર તાત્કાલિક કાર્યવાહી કરી અને દિવાળી મેગેઝિનમાંથી વિવાદાસ્પદ કવિતા દૂર કરી.”
વીએચપીએ એવી પણ માંગણી કરી હતી કે ભવિષ્યમાં ફક્ત દેશ, ધર્મ અને સંસ્કૃતિ પ્રત્યે સકારાત્મક દૃષ્ટિકોણ ધરાવતા લેખકોને જ સરકારી પ્રકાશનોમાં દર્શાવવામાં આવે.