war: યમનમાં ફરી યુદ્ધ ભભૂકી ઉઠ્યું? હુથી અને સેના વચ્ચે ભીષણ લડાઈ; ચાર દિવસમાં ૧૧૭ લોકોના મોત

war: પશ્ચિમી પ્રાંતો તાઈઝ અને હોદૈદાહમાં યમનની સરકારી સેના અને હુથી જૂથ વચ્ચે છેલ્લા ચાર દિવસથી ભીષણ સંઘર્ષ ચાલી રહ્યો છે. તબીબી અધિકારીઓના જણાવ્યા અનુસાર, અત્યાર સુધીમાં ઓછામાં ઓછા ૧૧૭ લોકો માર્યા ગયા છે.

તબીબી અધિકારીએ શું કહ્યું?
પશ્ચિમ કિનારાના મોરચે સરકારી દળો સાથે તૈનાત એક વરિષ્ઠ તબીબી અધિકારીએ નામ જાહેર ન કરવાની શરતે ‘શિનહુઆ’ સમાચાર એજન્સીને જણાવ્યું હતું કે ગુરુવારે લડાઈ શરૂ થઈ ત્યારથી સરકારી પક્ષના ૫૪ સૈનિકો માર્યા ગયા છે. અન્ય ઘણા સૈનિકો ઘાયલ થયા છે.

દરમિયાન, પશ્ચિમી હોદૈદાહ પ્રાંતમાં હુથીઓના નિયંત્રણ હેઠળની હોસ્પિટલોના બે તબીબી સૂત્રોએ અહેવાલ આપ્યો છે કે આ જ સમયગાળા દરમિયાન હુથી જૂથના ૬૩ સભ્યો માર્યા ગયા હતા, જેનાથી બંને પક્ષોમાં મૃત્યુઆંક વધીને ૧૧૭ પર પહોંચ્યો છે.

સંપૂર્ણ ઘટનાક્રમ શું છે?
યમનની સરકારી લડાયક વિમાનોએ શુક્રવારે હોદૈદાહ અને તાઈઝના પશ્ચિમી પ્રાંતોમાં હુથીઓના નિયંત્રણ હેઠળના વિસ્તારો પર હુમલા કર્યા હતા. વ્યૂહાત્મક મહત્વ ધરાવતા ‘બાબ અલ-મંદબ સ્ટ્રેટ’ (જળસંધિ) નજીક હુથી જૂથના મોટા આક્રમણનો સામનો કરી રહેલા જમીની દળોને સમર્થન આપવા માટે આ હુમલા કરવામાં આવ્યા હતા.

હુથી લડવૈયાઓએ શું કર્યું?
નામ જાહેર ન કરવાની શરતે વાત કરતા અધિકારીએ જણાવ્યું હતું કે જ્યારે બંને પ્રાંતોમાં અનેક મોરચે તીવ્ર લડાઈ ચાલી રહી હતી ત્યારે આ હવાઈ હુમલા કરવામાં આવ્યા હતા. હુથી લડવૈયાઓ ઝડપથી આગળ વધ્યા હતા અને છેલ્લા ૨૪ કલાકમાં અનેક વિસ્તારો પર કબજો જમાવ્યો હતો.

લડાયક વિમાનોએ કયા સ્થળોને નિશાન બનાવ્યા?
અધિકારીએ કહ્યું કે લડાયક વિમાનોએ એવા વિસ્તારોમાં હુથીઓના ઠેકાણાં અને હિલચાલને નિશાન બનાવ્યા જ્યાં જમીની લડાઈ ચાલી રહી હતી. હુમલા અથવા જાનહાનિ અંગેની વધુ વિગતો તાત્કાલિક ઉપલબ્ધ નહોતી. સરકારી લશ્કરી અધિકારીએ ‘શિનહુઆ’ને નામ જાહેર ન કરવાની શરતે જણાવ્યું હતું કે, હુથી દળોએ કબજો મેળવ્યાના થોડા કલાકો બાદ જ, સરકારી સૈનિકોએ રાત્રિ દરમિયાન કરેલા તીવ્ર વળતા હુમલામાં પશ્ચિમી તાઈઝમાં અનેક મહત્વપૂર્ણ સ્થળો પાછા મેળવી લીધા હતા.

તાજેતરમાં વધેલો આ સંઘર્ષ તાજેતરના વર્ષોમાં પશ્ચિમ યમનમાં જોવા મળેલી સૌથી ભીષણ જમીની લડાઈઓમાંની એક છે. વર્ષોની સાપેક્ષ શાંતિ બાદ, દેશમાં અનેક મોરચાઓ પર મોટા પાયે લડાઈ ફરી શરૂ થવા અંગે ચિંતાઓ ઊભી થઈ છે.