Vadodaraમાં રાષ્ટ્રપતિ મુર્મુનો વ્યસ્ત કાર્યક્રમ, MSU બાદ બ્રહ્મા કુમારીઓના સેન્ટરનું ઉદ્ઘાટન

Vadodara News: રાષ્ટ્રપતિ દ્રૌપદી મુર્મુ ગુજરાતની ત્રણ દિવસીય મુલાકાતે છે. મંગળવારે કેવડિયાના એકતા નગર ખાતે સ્ટેચ્યુ ઓફ યુનિટી નજીક યોજાયેલા 72મા રાષ્ટ્રીય ફિલ્મ પુરસ્કાર સમારોહમાં તેમણે બોલિવૂડ અને ફિલ્મ જગતના કલાકારોને સ્વાસ્થ્યને નુકસાન પહોંચાડતી વસ્તુઓનો પ્રચાર ન કરવાની અપીલ કરી હતી.

રાષ્ટ્રપતિએ કહ્યું “હું વિનંતી કરવા માંગુ છું કે લોકપ્રિય કલાકારો એવા પદાર્થોનો પ્રચાર કરવાનું ટાળે જે સ્વાસ્થ્ય માટે હાનિકારક હોય. સ્ટાર એ છે જે અંધકાર નહીં પણ પ્રકાશ ફેલાવે છે.”

અનંત નાગને દાદાસાહેબ ફાળકે પુરસ્કાર

સમારોહ દરમિયાન રાષ્ટ્રપતિ દ્રૌપદી મુર્મુએ પીઢ અભિનેતા અનંત નાગને દાદાસાહેબ ફાળકે પુરસ્કાર એનાયત કર્યો હતો. જ્યારે કાર્તિક આર્યન અને મામૂટીને શ્રેષ્ઠ અભિનેતાનો તથા યામી ગૌતમને શ્રેષ્ઠ અભિનેત્રીનો પુરસ્કાર આપવામાં આવ્યો હતો.

આજે MS યુનિવર્સિટીના દીક્ષાંત સમારોહમાં હાજરી

ગુજરાત પ્રવાસના બીજા દિવસે 23 સપ્ટેમ્બરે, રાષ્ટ્રપતિ વડોદરામાં મહારાજા સયાજીરાવ યુનિવર્સિટી (MSU)ના 75મા દીક્ષાંત સમારોહમાં મુખ્ય અતિથિ તરીકે હાજરી આપશે.

આ દરમિયાન તેઓ યુનિવર્સિટીના 202 પ્રતિભાશાળી વિદ્યાર્થીઓને સુવર્ણ ચંદ્રકો એનાયત કરશે. મહારાજા સયાજીરાવ યુનિવર્સિટીની સ્થાપના 77 વર્ષ પહેલાં બરોડા કોલેજમાંથી કરવામાં આવી હતી.

બ્રહ્મા કુમારીઓના કાર્યક્રમમાં પણ હાજરી

દીક્ષાંત સમારોહ બાદ રાષ્ટ્રપતિ વડોદરા જિલ્લામાં તાજપુર રોડ પર આવેલા બ્રહ્મા કુમારીઓના નવનિર્મિત ગ્લોબલ સ્પિરિચ્યુઅલ પેલેસ રીટ્રીટ સેન્ટરનું ઉદ્ઘાટન કરશે.

આ કેન્દ્રનો હેતુ આધ્યાત્મિક ચિંતન અને આધ્યાત્મિક જાગૃતિને પ્રોત્સાહન આપવાનો છે. આ પ્રસંગે રાષ્ટ્રપતિ ‘વિશ્વ નવીકરણ માટે આધ્યાત્મિક જાગૃતિ’ પ્રોજેક્ટનો પ્રારંભ કરશે.

ત્યારબાદ તેઓ ‘વિકસિત ભારત માટે યુવા’ અભિયાન અને ‘રાષ્ટ્ર નિર્માણ માટે આંતરિક શક્તિને જાગૃત કરવી’ કાર્યક્રમની શરૂઆત કરશે. આ કાર્યક્રમોમાં ગુજરાતના રાજ્યપાલ આચાર્ય દેવવ્રત અને મુખ્યમંત્રી ભૂપેન્દ્ર પટેલ પણ ઉપસ્થિત રહેશે.

ખરાબ હવામાનને કારણે રોડ માર્ગે કેવડિયા પહોંચ્યા

રાષ્ટ્રપતિ 21 સપ્ટેમ્બરની સાંજે ત્રણ દિવસીય ગુજરાત પ્રવાસે વડોદરા પહોંચ્યા હતા. વડોદરામાં અચાનક વરસાદ અને ખરાબ હવામાનને કારણે તેમનું હેલિકોપ્ટર ઉડાન ભરી શક્યું ન હતું. ત્યારબાદ તેઓ રોડ માર્ગે આશરે 90 કિલોમીટર દૂર નર્મદા જિલ્લાના એકતા નગર પહોંચ્યા હતા.

રાષ્ટ્રપતિની મુલાકાતને ધ્યાનમાં રાખીને વડોદરા શહેરમાં પ્રોટોકોલ મુજબ કડક સુરક્ષા વ્યવસ્થા ગોઠવવામાં આવી છે અને જરૂરી ટ્રાફિક ડાયવર્ઝન પણ કરવામાં આવ્યા છે.