Air India: ઇમિગ્રેશન ક્લિયરન્સ વિના જ રવાના થયા 3 ઇટાલિયન મુસાફરો… દિલ્હી એરપોર્ટ પર સુરક્ષામાં મોટી ચૂક; એર ઇન્ડિયાને નોટિસ ફટકારાઈ

Air India: ત્રણ ઇટાલિયન મુસાફરો ઇમિગ્રેશન ક્લિયરન્સની પ્રક્રિયા પૂર્ણ કર્યા વિના જ દિલ્હી એરપોર્ટ થઈને ભારતથી રવાના થઈ ગયા. નાગરિક ઉડ્ડયન મંત્રાલયે આ ઘટના અંગે એર ઇન્ડિયાને ‘શો-કોઝ’ (કારણદર્શક) નોટિસ ફટકારી છે અને સાત દિવસમાં જવાબ માંગ્યો છે.

દિલ્હી એરપોર્ટ પર સુરક્ષામાં મોટી ચૂકનો મામલો સામે આવ્યો છે, જેમાં ત્રણ ઇટાલિયન મુસાફરો ઇમિગ્રેશન ક્લિયરન્સ વિના જ દેશ છોડીને જતા રહ્યા. આ ત્રણેય મુસાફરો એર ઇન્ડિયાની ફ્લાઇટ દ્વારા અમૃતસરથી દિલ્હી આવ્યા હતા. આ ઘટના અંગે નાગરિક ઉડ્ડયન મંત્રાલયે જણાવ્યું હતું કે એર ઇન્ડિયાની ‘સ્ટાન્ડર્ડ ઓપરેટિંગ પ્રોસિજર’ (SOP) ની પાંચ જોગવાઈઓનું ઉલ્લંઘન થયું છે અને આ અંગે સાત દિવસમાં જવાબ આપવા માટે નોટિસ જારી કરી છે.

એર ઇન્ડિયાની SOP મુજબ, બોર્ડિંગ પાસનું વર્ગીકરણ બે રીતે કરવામાં આવે છે: સ્થાનિક (ડોમેસ્ટિક) મુસાફરો માટે ‘D’ અને આંતરરાષ્ટ્રીય મુસાફરો માટે ‘I’. મંત્રાલયના જણાવ્યા અનુસાર, આ કિસ્સામાં અનુસરવામાં આવેલી પ્રક્રિયા SOP મુજબ નહોતી. દિલ્હી આગમન સમયે, આ ત્રણેય મુસાફરોની ઓળખ આંતરરાષ્ટ્રીય મુસાફરો તરીકે થવી જોઈતી હતી અને તેમને સ્થાનિક મુસાફરોની ભીડથી અલગ કરીને ઇમિગ્રેશન તરફ મોકલવા જોઈતા હતા. તેના બદલે, તેમને ગેટ 39 થી ‘ઇન્ટરનેશનલ-ટુ-ઇન્ટરનેશનલ ટ્રાન્સફર એરિયા’માં લઈ જવામાં આવ્યા હતા.

ઇમિગ્રેશન ક્લિયરન્સ વિના જ ફ્લાઇટમાં સવાર થયા

ત્યાંથી, તેઓ ડિપાર્ચર એરિયા (રવાના થવાના વિસ્તાર) તરફ આગળ વધ્યા અને ઇમિગ્રેશન ચેકપોઇન્ટમાંથી પસાર થયા વિના જ લુફ્થાન્સાની ફ્લાઇટમાં સવાર થઈ ગયા. મંત્રાલયે વધુમાં નોંધ્યું હતું કે આ ત્રણેય મુસાફરો એર ઇન્ડિયાની ‘હબ-એન્ડ-સ્પોક’ સિસ્ટમ હેઠળ મુસાફરી કરી રહ્યા હતા, જેમાં મુસાફરોને પહેલા નાના એરપોર્ટથી મુખ્ય ‘હબ’ એરપોર્ટ પર લાવવામાં આવે છે. આ મુસાફરો અમૃતસરથી દિલ્હી આવ્યા હતા; અમૃતસર ખાતે તેમને એર ઇન્ડિયાની સ્થાનિક ફ્લાઇટ માટે ‘D’ (સ્થાનિક) બોર્ડિંગ પાસ આપવામાં આવ્યા હતા.