Jamnagar: ધ્રોલના ગોકુલપર વિસ્તારમાં ટેન્કરમાંથી પેટ્રોલ અને ડીઝલની ચોરી પકડાઈ, 32.49 લાખ રૂપિયાનો માલ જપ્ત
Jamnagar: જામનગર જિલ્લાના ધ્રોલ પોલીસ સ્ટેશનની પોલીસ ટીમે ગોકુલપર ગામમાં એક મંદિર પાસેના ખુલ્લા મેદાનમાં દરોડો પાડ્યો હતો અને ટેન્કરમાંથી ગેરકાયદેસર રીતે પેટ્રોલ અને ડીઝલ ભરીને પ્લાસ્ટિકના કન્ટેનરમાં વેચતા બે શખ્સોની ધરપકડ કરી હતી. પોલીસે કુલ 32,49,499 રૂપિયાનો મુદ્દામાલ જપ્ત કર્યો હતો અને બંને આરોપીઓ સામે ભારતીય દંડ સંહિતાની કલમ 287 અને 54 હેઠળ ગુનો નોંધ્યો હતો અને વધુ તપાસ કરી રહી છે.
ફરિયાદ મુજબ, ધ્રોલ પોલીસ સ્ટેશનના પોલીસકર્મીઓ લતીપર વિસ્તારમાં પેટ્રોલિંગમાં હતા ત્યારે, એક ખાનગી સૂચનાના આધારે, ગોકુલપર ગામમાં દરોડો પાડવામાં આવ્યો હતો. ત્યાં, તેઓ ટેન્કરનું સીલ તોડીને પ્લાસ્ટિક પાઇપ દ્વારા બ્રેઝા કારમાં રાખેલા પ્લાસ્ટિકના કન્ટેનરમાં પેટ્રોલ અને ડીઝલ ભરતા જોવા મળ્યા હતા.
પોલીસે સ્થળ પરથી મથુરભાઈ રામભાઈ બલસારા (૨૮, રહે. વિદ્યુતનગર, મોરબી) અને સોમભાઈ વાકુભાઈ નાગેશ (૪૦, હાલ રહે. પડાણ, લાલપુર, મૂળ રહે. દાત્રાણા, દેવભૂમિ દ્વારકા) ની ધરપકડ કરી હતી.
દરોડા દરમિયાન, GJ07-YZ ૪૦૦૪ નંબરનું ટેન્કર, GJ36 R6419 નંબરની બ્રેઝા કાર, અંદાજે ૮૦ લિટર ડીઝલ, ૪૦ લિટર પેટ્રોલ, પ્લાસ્ટિક પાઇપ, સીલ તોડવા માટે કટીંગ ગ્રીપ, બે મોબાઈલ ફોન અને કુલ ૩૨,૪૯,૪૯૯ રૂપિયાનું ઇંધણ જપ્ત કરવામાં આવ્યું હતું.
પ્રાથમિક તપાસમાં જાણવા મળ્યું છે કે ટેન્કરમાં અંદાજે ૯,૯૬૦ લિટર પેટ્રોલ અને ૯,૯૨૦ લિટર ડીઝલ હતું, જેનું બિલ લાખોમાં હતું. પોલીસે બંને આરોપીઓની ધરપકડ કરી વધુ તપાસ શરૂ કરી છે.