Sonam Wangchukની પત્નીનો રાહુલ ગાંધી પર પ્રહાર, કહ્યું- PMO નહીં, જંતર-મંતર પર વિદ્યાર્થીઓ સાથે બેસવું જોઈએ હતું

Sonam Wangchuk Wife angry on Rahul on Rahul Gandhi : NEET પેપર લીક મુદ્દે ભૂખ હડતાળ પર બેઠેલા સોનમ વાંગચુકની પત્ની ગીતાંજલિ અંગ્મોએ રાહુલ ગાંધીના વિરોધ પ્રદર્શન પર સવાલ ઉઠાવ્યા છે. તેમણે કહ્યું કે વડાપ્રધાન કાર્યાલય (PMO) બહાર વિરોધ કરવા કરતાં જંતર-મંતર પર વિદ્યાર્થીઓ સાથે બેસીને તેમનો સાથ આપવો વધુ યોગ્ય હતો. તેમણે આ પગલાને “બિન-નિષ્ઠાવાન” ગણાવ્યું.

ઇન્ડિયા ટુડે ટીવીને આપેલા ઇન્ટરવ્યુમાં ગીતાંજલિ અંગ્મોએ કહ્યું કે જો રાહુલ ગાંધી ખરેખર વિદ્યાર્થીઓના પ્રશ્નો પ્રત્યે ગંભીર હોત, તો તેઓ સીધા જંતર-મંતર પર જઈ વિદ્યાર્થીઓ સાથે ઉભા રહેતા. તેમણે ઉમેર્યું કે આજે લોકો જાગૃત છે અને માત્ર રાજકીય દેખાવાથી તેમને ગેરમાર્ગે દોરી શકાય તેમ નથી.

આમ આદમી પાર્ટીએ પણ આ મુદ્દે રાહુલ ગાંધીની ટીકા કરી છે. પાર્ટીએ સોશિયલ મીડિયા પર વીડિયો શેર કરીને જણાવ્યું કે જો કોંગ્રેસના ઇરાદા સ્પષ્ટ હોત તો રાહુલ ગાંધી PMO બહાર વિરોધ કરવાને બદલે જંતર-મંતર પર વિદ્યાર્થીઓ સાથે દેખાયા હોત.

બીજી તરફ કેન્દ્રીય મંત્રી જે.પી. નડ્ડાએ પણ રાહુલ ગાંધી પર નિશાન સાધતા કહ્યું કે પેપર લીક જેવા ગંભીર મુદ્દાનું રાજકારણ ન થવું જોઈએ. તેમણે દાવો કર્યો કે કોંગ્રેસ અને તેના સાથી પક્ષોના શાસન દરમિયાન પણ અનેક પેપર લીક થયા હતા અને રાહુલ ગાંધી આ મુદ્દે પસંદગીયુક્ત રાજકારણ કરી રહ્યા છે.

નડ્ડાએ વધુમાં જણાવ્યું કે સરકાર દરેક પેપર લીક કેસની તપાસ માટે પ્રતિબદ્ધ છે અને સત્ય જનતા સમક્ષ આવશે. સાથે જ તેમણે આરોપ લગાવ્યો કે વિપક્ષનો મુખ્ય ઉદ્દેશ વિદ્યાર્થીઓનું કલ્યાણ નહીં પરંતુ રાજકીય લાભ મેળવવાનો છે.