Ahmedabad airport પર ₹4 કરોડના હાઇડ્રોપોનિક ગાંજા સાથે યાત્રી ઝડપાયો,બેંગકોકથી આવેલા મુસાફરની કસ્ટમ્સે કરી ધરપકડ

Ahmedabad airport News: અમદાવાદ એરપોર્ટ પર કસ્ટમ્સ વિભાગે મોટી કાર્યવાહી કરતાં બેંગકોકથી આવેલા એક મુસાફર પાસેથી આશરે ₹4 કરોડની કિંમતનો હાઇડ્રોપોનિક ગાંજા જપ્ત કર્યો છે. ખાદ્ય પદાર્થોના પેકેટમાં છુપાવીને લાવવામાં આવેલા આ પ્રતિબંધિત નશીલા પદાર્થ સાથે મહારાષ્ટ્રના 40 વર્ષીય વ્યક્તિની ધરપકડ કરવામાં આવી છે.

ફૂડ પેકેટમાં છુપાવ્યો હતો ગાંજો

આ ઘટના 1 જુલાઈએ બની હતી, જ્યારે બેંગકોકથી આવેલી ફ્લાઇટ TG-343 અમદાવાદ પહોંચી હતી. કસ્ટમ્સના એર ઇન્ટેલિજન્સ યુનિટ (AIU) ને એક મુસાફરની હિલચાલ શંકાસ્પદ લાગતા તેની તપાસ કરવામાં આવી હતી. ટ્રોલી બેગમાં રહેલા ફૂડ પેકેટ ખોલતાં અંદર 22 પારદર્શક પોલિઇથિલિન પેકેટ મળી આવ્યા હતા.

તપાસમાં બહાર આવ્યું મોટું રહસ્ય

અધિકારીઓ દ્વારા કરવામાં આવેલા ફિલ્ડ ટેસ્ટમાં જાણવા મળ્યું કે પેકેટમાં ઉચ્ચ ગુણવત્તાવાળો હાઇડ્રોપોનિક ગાંજો ભરેલો હતો. જપ્ત કરાયેલા ગાંજાનું કુલ વજન 4.276 કિલોગ્રામ હોવાનું સામે આવ્યું છે.

આંતરરાષ્ટ્રીય બજારમાં કરોડોની કિંમત

કસ્ટમ્સ વિભાગના જણાવ્યા અનુસાર, જપ્ત કરાયેલા હાઇડ્રોપોનિક ગાંજાની આંતરરાષ્ટ્રીય બજારમાં અંદાજિત કિંમત આશરે ₹4 કરોડ છે. સમગ્ર કન્સાઇન્મેન્ટ NDPS એક્ટ હેઠળ જપ્ત કરવામાં આવ્યું છે અને આરોપીને કાયદેસરની કાર્યવાહી હેઠળ અટકાયત કરવામાં આવ્યો છે.

ડ્રગ નેટવર્કની કડી શોધવામાં તપાસ એજન્સીઓ વ્યસ્ત

પ્રાથમિક તપાસ બાદ હવે એજન્સીઓ એ જાણવાનો પ્રયાસ કરી રહી છે કે આરોપી માત્ર કુરિયર તરીકે કામ કરતો હતો કે પછી કોઈ મોટા આંતરરાષ્ટ્રીય ડ્રગ્સ નેટવર્કનો ભાગ હતો. આ કન્સાઇન્મેન્ટ કોના માટે લાવવામાં આવ્યું હતું અને તેની પાછળ કોણ છે તે અંગે ઊંડાણપૂર્વક તપાસ ચાલી રહી છે.

હાઇડ્રોપોનિક ગાંજો કેમ છે ખાસ?

હાઇડ્રોપોનિક ગાંજાને સામાન્ય ગાંજા કરતાં વધુ શક્તિશાળી અને મોંઘો માનવામાં આવે છે. તેની ઊંચી માંગને કારણે આંતરરાષ્ટ્રીય ડ્રગ સિન્ડિકેટ્સ તેને દાણચોરી માટે નવી-નવી રીતો અપનાવે છે. આ વખતે ફૂડ પેકેટનો ઉપયોગ કરવામાં આવ્યો હતો, પરંતુ કસ્ટમ્સની સતર્કતાથી સમગ્ર કાવતરાનો પર્દાફાશ થયો.