Protests: નોઈડામાં પગાર વધારાને લઈને હોબાળો, ખાનગી કંપનીના કર્મચારીઓએ વાહનોને આગ ચાંપી, પોલીસ સાથે અથડામણ

Protests: હરિયાણાના ગુરુગ્રામ પછી, ઉત્તર પ્રદેશના નોઈડામાં કર્મચારીઓએ પગાર વધારાની માંગણી સાથે હિંસક વિરોધ પ્રદર્શન કર્યા છે. નોઈડાના ફેઝ 2 વિસ્તારમાં એક ખાનગી કંપનીના કર્મચારીઓ રસ્તા પર ઉતરી આવ્યા હતા, તોડફોડ કરી હતી અને ઇમારતોમાં આગ લગાવી હતી, જેના કારણે અરાજકતા ફેલાઈ હતી. પરિસ્થિતિને કાબુમાં લેવા માટે પોલીસને ટીયર ગેસ અને લાઠીચાર્જ કરવાની ફરજ પડી હતી.

કર્મચારીઓનો ગુસ્સો અને હિંસા

અહેવાલો અનુસાર, નોઈડા ફેઝ 2 માં મધરસન કંપનીના કર્મચારીઓ પગાર વધારા સહિત અનેક માંગણીઓ માટે વિરોધ કરી રહ્યા હતા. સોમવારે સવારે હજારો કર્મચારીઓ કંપનીના ગેટ પાસે એકઠા થયા હતા. શરૂઆતમાં જે શાંતિપૂર્ણ લાગતું હતું તે હિંસક બન્યું. ઉશ્કેરાયેલા ટોળાએ કંપનીની આસપાસ પાર્ક કરેલા અનેક વાહનોમાં તોડફોડ કરી અને કેટલાકને આગ ચાંપી દીધી.

પોલીસ પર પથ્થરમારો

પરિસ્થિતિને કાબુમાં લેવા માટે મોટી સંખ્યામાં પોલીસ કર્મચારીઓ તૈનાત કરવામાં આવ્યા હતા, પરંતુ હિંસક ટોળાએ પોલીસ પર પથ્થરમારો શરૂ કર્યો. પોલીસે વિરોધ કરનારાઓને વિખેરવા માટે બળનો ઉપયોગ કરવો પડ્યો. પોલીસે લાઠીચાર્જ અને ટીયર ગેસથી ભીડને ભગાડી દીધી. હાલમાં, વિસ્તારમાં ભારે પોલીસ દળ તૈનાત છે અને પરિસ્થિતિ નિયંત્રણમાં હોવાનું કહેવાય છે.