Amreli: ટ્રેન પાટા પરથી ઉથલાવવાનું કાવતરું! ચિતલ અને ખીજડિયા વચ્ચે પાટા પર પથ્થરો અને થાંભલા મૂક્યા, મોટી દૂર્ઘટના ટળી

Amreli: અમરેલી જિલ્લાના ચિતલ અને ખીજડિયા વચ્ચે રેલ્વે ટ્રેક પર અવરોધો મૂકીને ભાવનગર-પોરબંદર પેસેન્જર ટ્રેનને પાટા પરથી ઉથલાવવાનું કાવતરું ઘડવામાં આવ્યું હતું. જોકે, લોકો પાઇલટની સતર્કતાને કારણે સેંકડો મુસાફરોના જીવ બચી ગયા હતા.

શું હતી આખી ઘટના?

અહેવાલો અનુસાર, જ્યારે ભાવનગર-પોરબંદર પેસેન્જર ટ્રેન ચિતલથી ખીજડિયા જઈ રહી હતી, ત્યારે અચાનક પાટા પર પથ્થરો અને લોખંડના થાંભલા દેખાયા. પાટા પર આ વસ્તુઓ જોઈને, પાયલોટે તાત્કાલિક ઇમરજન્સી બ્રેક લગાવી અને ટ્રેનને રોકી દીધી.

ઘટનાની માહિતી મળતાં, અમરેલી પોલીસ, રેલ્વે પ્રોટેક્શન ફોર્સ (RPF) અને વરિષ્ઠ રેલ્વે અધિકારીઓનો કાફલો ઘટનાસ્થળે પહોંચ્યો. પોલીસે પાટા પરથી પથ્થરો અને થાંભલા કબજે કર્યા છે અને ફોરેન્સિક તપાસ હાથ ધરી છે. આ જઘન્ય કૃત્યના અજાણ્યા ગુનેગારોને પકડવા માટે આસપાસના વિસ્તારમાં સર્ચ ઓપરેશન શરૂ કરવામાં આવ્યું છે.