SIR: આમ આદમી પાર્ટીના મહેસાણા જિલ્લા પ્રમુખ એડવોકેટ જયદેવસિંહ ચાવડાએ વીડિયોના માધ્યમથી જણાવ્યું હતું કે, મહેસાણા જિલ્લાના સતલાસણ તાલુકાના સુદાસણ ગામના દિનેશભાઈ રાવળ પ્રાથમિક શાળાના શિક્ષક તરીકે ફરજ બજાવતા હતા અને અત્યારે બીએલઓ તરીકેની કામગીરી કરી રહ્યા હતા. બીએલઓની કામગીરીના સ્ટ્રેસના કારણે આજે હાર્ટ એટેકથી તેમનું દુઃખદ અવસાન થયું છે. મૃતક દિનેશભાઈ રાવળના પરિવારજનોના કહેવા પ્રમાણે દિનેશભાઈ મોડી રાત સુધી ફોર્મ અપલોડ કરતા હતા અને વહેલી સવારે પણ ઊઠીને ફોર્મ અપલોડ કરતા હતા અને બાળકોને ભણાવતા હતા અને બીએલઓ તરીકે કામગીરી પણ કરતા હતા આ બધા સ્ટ્રેસના કારણે તેમનું દુઃખદ અવસાન થયું છે. આમ આદમી પાર્ટી અત્યારે તેમના પરિવારની સાથે આ દુઃખની ઘડીમાં ઉભી છે અને પ્રભુને પ્રાર્થના કરીએ છીએ કે પ્રભુ તેમની આત્માને શાંતિ આપે અને પરિવારને આ દુઃખના સમયમાં દુઃખ સહન કરવાની શક્તિ આપે.
AAP નેતા જયદેવસિંહ ચાવડાએ વધુમાં જણાવ્યું હતું કે, અત્યાર સુધીના આંકડા પ્રમાણે ગુજરાતમાં એક બીએલઓએ આપઘાત કર્યો છે અને છ થી વધારે બીએલઓ હાર્ટ અટેકથી મૃત્યુ પામ્યા છે અને 20 થી વધારે બીએલઓ અત્યારે હોસ્પિટલાઈઝ છે. આપણે સૌ જાણીએ છીએ કે એસઆઇઆરની પ્રક્રિયામાં બીએલઓ તરીકે ફરજ બજવતા તમામ લોકો ઉપર ખૂબ જ સ્ટ્રેસ છે. આ બીએલઓ પ્રાથમિક શાળાના શિક્ષકો પણ છે તેમણે સવારે બાળકોને ભણાવવાના પણ હોય છે ત્યારબાદ તેમને એસઆઈઆરના ફોર્મ ભરવાના હોય છે અને ત્યારબાદ આ ફોર્મ પણ તેમને અપલોડ કરવાના હોય છે. ફોર્મ અપલોડ કરવા માટેનું સર્વર પણ ડાઉન હોય છે જેના કારણે આ શિક્ષકોને મોડી રાત સુધી જાગીને અથવા વહેલી સવારે ઊઠીને આ ફોર્મ સબમીટ કરવા પડે છે. તેથી ચૂંટણી પંચને અમે વિનંતી કરીએ છીએ કે એસઆઈઆરની કામગીરીની ડેડ લાઈન વધારવામાં આવે તેમજ ગુજરાત સરકારને પણ અમે વિનંતી કરીએ છીએ કે આ બીએલઓ જે કામગીરી કરી રહ્યા છે એમને સહયોગી આપવામાં આવે અને સહયોગી તરીકે અન્ય શિક્ષકોને પણ કામગીરી આપવામાં આવે તેમજ ઓનલાઈનની જે કામગીરી છે તે બીજા ખાતાના કર્મચારીઓને આપવામાં આવે.