Gujaratમાં 59 આદિવાસી અને દલિતોના ધર્માંતરણનો પ્રયાસ, આરોપીના બેન્ક એકાઉન્ટથી થયા ચોંકાવનારા ખુલાસા

Gujarat News: ગુજરાતના નડિયાદમાં દલિત અને આદિવાસી સમુદાયોને લાલચ આપીને ખ્રિસ્તી ધર્મમાં રૂપાંતરિત કરવાનો એક મામલો પ્રકાશમાં આવ્યો છે. સ્ટીવન મેકવાન તરીકે ઓળખાયેલ આરોપી 28 સપ્ટેમ્બરના રોજ એક સેમિનારમાં નવ સગીરો સહિત 59 લોકોને ધર્માંતરણ કરવાનો પ્રયાસ કરી રહ્યો હતો. પોલીસે તેની ધરપકડ કરી હતી. ખેડા પોલીસ સ્ટેશનના એક અધિકારીએ જણાવ્યું હતું કે આરોપી છેલ્લા ત્રણ વર્ષથી આવી પ્રવૃત્તિઓમાં સામેલ હતો અને વિદેશી નાગરિકો પાસેથી ભંડોળ મેળવતો હતો. તેની ધરપકડ બાદ, આરોપીને સ્થાનિક કોર્ટમાં રજૂ કરવામાં આવ્યો હતો. જ્યાં તેને સાત દિવસ માટે પોલીસ કસ્ટડીમાં મોકલવામાં આવ્યો હતો.

પોલીસે જણાવ્યું હતું કે મેકવાનના બેંક ખાતાઓની તપાસમાં છેલ્લા ત્રણ વર્ષમાં આશરે ₹1.34 કરોડના વ્યવહારો બહાર આવ્યા હતા અને તેમાં વિદેશી દાતાઓ પણ સામેલ હતા. આરોપી સાથે સંકળાયેલ ટ્રસ્ટ, રિસ્ટોરેશન રિવાઇવલ ટ્રસ્ટ, હવે પોલીસ તપાસ હેઠળ આવ્યું છે.

પોલીસ દ્વારા એક પ્રેસ રિલીઝ પણ જારી કરવામાં આવી હતી, જેમાં કહેવામાં આવ્યું હતું કે “પોલીસ હાલમાં તપાસ કરી રહી છે અને નક્કી કરવાનો પ્રયાસ કરી રહી છે કે આ કાર્ય માટે વિદેશી નાગરિકો પાસેથી મળેલા ભંડોળ કોઈ વિદેશી સંગઠન સાથે જોડાયેલા હતા કે નહીં.” પ્રેસ રિલીઝમાં દાવો કરવામાં આવ્યો છે કે મેકવાન પોતાની પ્રવૃત્તિઓ કરવા માટે ગુજરાત સહિત દેશના અન્ય રાજ્યો અને પડોશી દેશ નેપાળમાં પણ પ્રવાસ કરતો હતો.

આરોપી સ્ટીવન સામે Gujarat ધર્મ સ્વતંત્રતા (સુધારા) અધિનિયમ હેઠળ છેતરપિંડી, બળજબરી અથવા ખોટી રજૂઆત દ્વારા ધર્મ પરિવર્તન અને ધાર્મિક પરિવર્તન માટે જિલ્લા મેજિસ્ટ્રેટ પાસેથી પૂર્વ લેખિત પરવાનગી મેળવવામાં નિષ્ફળતા બદલ કેસ નોંધવામાં આવ્યો છે. ભારતીય દંડ સંહિતા (BNS) ની સંબંધિત કલમો હેઠળ પણ કેસ નોંધવામાં આવ્યો છે.

પોલીસે અહેવાલ આપ્યો છે કે નડિયાદમાં સેમિનારમાં હાજર નવ સગીરોને બાળ સંરક્ષણ ગૃહમાં મોકલવામાં આવ્યા છે. પોલીસે દાવો કર્યો હતો કે અનુસૂચિત જાતિની એક છોકરીએ તેના પિતાની સંમતિ વિના આ કાર્યક્રમમાં બાપ્તિસ્મા લીધું હતું.