Peter Navarro: રશિયન તેલ ખરીદીને અન્યાયી વેપાર’, યુએસ ચીફ નેગોશિએટરની ભારત મુલાકાત પહેલા નાવારોએ ફરી ઝેર ઓક્યું

Peter Navarro: યુએસ ચીફ નેગોશિએટર બ્રેન્ડન લિંચની ભારત મુલાકાત પહેલા, વ્હાઇટ હાઉસના વેપાર સલાહકાર પીટર નાવારોએ સોમવારે ફરી એકવાર વેપાર નીતિઓ પર નવી દિલ્હી પર નિશાન સાધ્યું. ટેલિવિઝન ચેનલ સીએનબીસી ઇન્ટરનેશનલ સાથેની વાતચીતમાં, નાવારોએ કહ્યું, “યુદ્ધ પછી તરત જ, ભારતના રિફાઇનર્સ રશિયન રિફાઇનર્સ સાથે સંકળાયેલા હતા. તેઓ અમારી સામે અન્યાયી વેપાર દ્વારા પૈસા કમાતા હતા અને ઘણા કામદારોને નુકસાન થયું હતું. તેઓ આ પૈસાનો ઉપયોગ રશિયન તેલ ખરીદવા માટે કરે છે અને રશિયા તેનો ઉપયોગ શસ્ત્રો ખરીદવા માટે કરે છે.” તેમણે કહ્યું, ભારત વાટાઘાટો માટે આવી રહ્યું છે પરંતુ વેપારની દ્રષ્ટિએ તેમના ટેરિફ ખૂબ ઊંચા છે. 

બ્રેન્ડન લિંચ દક્ષિણ અને મધ્ય એશિયા માટે યુએસ સહાયક વેપાર પ્રતિનિધિ છે. તેઓ 15 સપ્ટેમ્બરની રાત્રે ભારત પહોંચશે. તેઓ ભારતના મુખ્ય વાટાઘાટકાર રાજેશ અગ્રવાલ સાથે મુલાકાત કરશે. મીડિયા અહેવાલો અનુસાર, અગ્રવાલે કહ્યું કે બંને પક્ષો વાટાઘાટોને ઝડપથી આગળ વધારવા માંગે છે. તેમણે લિંચની એક દિવસીય મુલાકાતની પુષ્ટિ કરી. અમેરિકી ટીમની મુલાકાત અગાઉ 25 થી 29 ઓગસ્ટ દરમિયાન થવાની હતી. પરંતુ અમેરિકાએ રશિયન તેલ ખરીદવા બદલ ભારત પર 25 ટકાનો વધારાનો ટેરિફ લાદ્યો. આનાથી કુલ ટેરિફ 50 ટકા સુધી વધી ગયો. આ ભારે ટેરિફને કારણે બંને દેશો વચ્ચે તણાવ જોવા મળ્યો.