Gujarat: સિઝનનો 80% વરસાદ, 167 તાલુકામાં 20 ઈંચથી વધુ વરસાદ, વલસાડમાં સૌથી વધારે 78 ઈંચ વરસાદ

ગુજરાતમાં ચોમાસાની સીઝન જોરશોરથી ચાલી રહી છે. અત્યારસુધી સરેરાશ 27.50 ઈંચ વરસાદ સાથે 80 ટકા વરસાદ નોંધાઈ ગયો છે. રાજ્યના 37 તાલુકામાં 40 ઈંચથી વધુ વરસાદ પડ્યો છે. વરસાદની આવકને કારણે જળાશયોમાં જળસ્તર સતત વધી રહ્યું છે અને હાલ 207 જળાશયોમાં સરેરાશ જળસ્તર 78.82 ટકા છે. 59 જળાશયો સંપૂર્ણ ક્ષમતા સુધી પહોંચી ચૂક્યા છે, જ્યારે 78 જળાશયો હાઈઍલર્ટ પર છે.

સરદાર સરોવરમાં જળસ્તર 82 ટકા સુધી પહોંચ્યું છે.

ગયા વર્ષે 23 ઓગસ્ટ સુધી ગુજરાતમાં 26 ઈંચ એટલે કે 75 ટકા વરસાદ પડ્યો હતો. આ વર્ષે રીજિયન મુજબ જોવામાં આવે તો કચ્છમાં 83 ટકા, દક્ષિણ ગુજરાતમાં 81.66 ટકા, ઉત્તર ગુજરાતમાં 79.33 ટકા વરસાદ થયો છે. જિલ્લા પ્રમાણે વલસાડમાં 77.50 ઈંચ, ડાંગમાં 64.33 ઈંચ અને નવસારીમાં 59.05 ઈંચ વરસાદ નોંધાયો છે.

રાજ્યના 42 તાલુકામાં સિઝનનો 100 ટકા વરસાદ થઈ ગયો છે. વલસાડ જિલ્લાના કપરાડા તાલુકામાં 101.37 ઈંચ સાથે સૌથી વધુ વરસાદ પડ્યો છે. આ ઉપરાંત તાપીના ડોલવણ, વલસાડના વાપી અને નવસારીના ખેરગામમાં 80 ઈંચથી વધુ વરસાદ થયો છે. તેમ છતાં, હજુ પણ કેટલાક તાલુકા એવા છે જ્યાં 60 ટકાથી ઓછો વરસાદ છે. તેમાં કચ્છનો રાપર, મહેસાણાનો બેચરાજી, પાટણના ચાણસ્મા-હારીજ-શંખેશ્વર-સાંતલપુર-સમી-રાધનપુર, બનાસકાંઠાનો સુઇગામ, અરવલ્લીનો બાયડ, સાબરકાંઠાનો પોસિના, મહેસાણાના જોટાણા-કડી, અમદાવાદના ધોલેરા-સાણંદ, છોટાઉદેપુરના ક્વાંટ-નસવાડી, પંચમહાલના ઘોઘંબા-હાલોલ-મોરવા હડફ અને ખેડાનો ઠાસરો મુખ્ય છે.

હાલમાં ગુજરાતના 59 જળાશયો 100 ટકા ભરાયા છે. 71 જળાશયો 70 થી 100 ટકા, 31 જળાશયો 50 થી 70 ટકા, 26 જળાશયો 25 થી 50 ટકા અને 19 જળાશયો 25 ટકાથી ઓછા સ્તરે છે.

શનિવારે રાજ્યના 207 તાલુકામાં વરસાદ નોંધાયો હતો. જેમાં વલસાડના ધરમપુરમાં સૌથી વધુ 4.25 ઈંચ, જૂનાગઢના ભેસાણમાં 4 ઈંચ અને વલસાડના પારડીમાં 3.54 ઈંચ વરસાદ પડ્યો હતો. તાપીના વ્યારા-સોનગઢ અને નર્મદાના ગરૂડેશ્વર-નાંદોદમાં પણ 3 ઈંચ વરસાદ થયો છે.

હવામાન વિભાગે રવિવારે (24 ઓગસ્ટ) ભારે થી અતિ ભારે વરસાદની આગાહી કરી છે. સાબરકાંઠા, નવસારી, વલસાડ, દમણ અને દાદરા નગર હવેલીમાં રેડ ઍલર્ટ જાહેર કરાયું છે. જ્યારે અરવલ્લી, મહીસાગર, ડાંગ, તાપી, જૂનાગઢ અને કચ્છમાં ઓરેન્જ ઍલર્ટ જાહેર કરવામાં આવ્યું છે.

આ પણ વાંચો

• Israel હુથીના ટોચના જનરલ ઇસ્માઇલ હનીયેહ જેવું જ પરિણામ ભોગવવાનું હતું, પરંતુ તેણે ભૂલ કરી
• Ahmedabad: સાબરમતી નદીમાં પૂરનું જોખમ, વાસણા બેરેજના 28 દરવાજા ખૂલ્યા, રિવરફ્રન્ટ વોક-વે પાણીમાં ગરક
• Surat: ગણેશ ચતુર્થી પૂર્વનો વીકએન્ડ ગણેશ આગમનનો ખાસ દિવસ બન્યો
• Jharkhand: ભૂતપૂર્વ મુખ્યમંત્રી ચંપાઈ સોરેનના ઘરે ધરપકડ, વિરોધમાં RIMS-2 જમીન પર ખેડાણ કરવાના હતા
• AMC એ 10 વર્ષમાં વરસાદી પાણીના નિકાલ માટે ₹200 કરોડ ખર્ચ્યા, છતાં વરસાદી પાણી ઓસરવામાં કલાકો