Gujarat News: ગુજરાતના બનાસકાંઠામાં એક યુવકની ફરિયાદ પર, પોલીસે તેના 18 વર્ષીય લિવ-ઇન પાર્ટનરના મૃત્યુની તપાસ શરૂ કરી છે. હાઇકોર્ટમાં યુવક દ્વારા દાખલ કરાયેલી હેબિયસ કોર્પસ અરજી પર સુનાવણીના બે દિવસ પહેલા જ છોકરીનું મૃત્યુ થયું હતું. ત્યારબાદ યુવકે પોલીસમાં ફરિયાદ કરી હતી અને છોકરીના પરિવાર દ્વારા તેની હત્યા કરવામાં આવી હોવાની આશંકા વ્યક્ત કરી હતી. યુવકનું કહેવું છે કે તેના મૃત્યુ પહેલા, લિવ-ઇન પાર્ટનરે તેને સોશિયલ મીડિયા પર મેસેજ પણ કર્યો હતો અને કહ્યું હતું કે તેના જીવને જોખમ છે. આ પછી, હાઇકોર્ટમાં હાજર થયાના બે દિવસ પહેલા તેનું મૃત્યુ થયું હતું. યુવકે તેની પ્રેમિકાના મૃત્યુ માટે પોલીસને પણ જવાબદાર ઠેરવી હતી અને દાવો કર્યો હતો કે તેઓ છોકરીને બળજબરીથી લઈ ગયા હતા અને તેને તેના સંબંધીઓને સોંપી દીધી હતી.
આ અંગે માહિતી આપતાં એક પોલીસ અધિકારીએ જણાવ્યું હતું કે ફરિયાદી યુવકનું નામ હરેશ ચૌધરી (23) છે. જેમણે આ અંગે ફરિયાદ અરજી આપી હતી. જેના પર કાર્યવાહી કરતા બનાસકાંઠાના પોલીસ અધિક્ષક અક્ષયરાજ મકવાણાએ 25 જૂને તેની કિશોરવયની પ્રેમિકાના મૃત્યુની તપાસનો આદેશ આપ્યો છે. એસપીએ શુક્રવારે આ વાતની પુષ્ટિ કરી હતી અને કહ્યું હતું કે દાંતા ડિવિઝનના સહાયક પોલીસ અધિક્ષક આ કેસની તપાસ કરી રહ્યા છે.
બનાસકાંઠાના થરાદ તાલુકાના રહેવાસી ફરિયાદી યુવક હરેશ ચૌધરીએ પોતાની ફરિયાદમાં શંકા વ્યક્ત કરી હતી કે છોકરીના સંબંધીઓએ તેની હત્યા કરી છે. કારણ કે તેઓ તેમના સંબંધની વિરુદ્ધ હતા અને છોકરીના લગ્ન બીજા કોઈ સાથે કરાવવા માંગતા હતા.
ચૌધરીએ કહ્યું કે ‘મેં અને છોકરીએ મે મહિનામાં અમદાવાદમાં લિવ-ઇન રિલેશનશિપના ઔપચારિક કરાર પર હસ્તાક્ષર કર્યા હતા અને ત્યારબાદ અમે મધ્યપ્રદેશ અને રાજસ્થાન ગયા હતા. 12 જૂને થરાદના ત્રણ પોલીસકર્મીઓ અને છોકરીના એક સંબંધીએ અમને રાજસ્થાનની એક હોટલમાં શોધી કાઢ્યા.’
પોતાની ફરિયાદમાં યુવકે વધુમાં જણાવ્યું હતું કે ‘અમે મળ્યા પછી, છોકરીને તેના કાકાને સોંપી દેવામાં આવી હતી. જ્યારે મને કચ્છ જિલ્લાના ભચાઉમાં નોંધાયેલા એક જૂના કેસમાં ધરપકડ કરવામાં આવી હતી. બીજા દિવસે જ્યારે છોકરીને થરાદ પોલીસ સ્ટેશન લાવવામાં આવી. ત્યારે તેણે તેના માતાપિતાના ઘરે જવાનો ઇનકાર કર્યો હતો.’
ચૌધરીએ વધુમાં કહ્યું ‘આ પછી પોલીસે છોકરીને ખોટા કેસમાં ફસાવવાની ધમકી આપીને ઘરે જવા માટે દબાણ કર્યું. જૂનના અંતમાં જ્યારે હું જેલમાંથી બહાર આવ્યો ત્યારે મને ખબર પડી કે 17 જૂને છોકરીએ મને ઇન્સ્ટાગ્રામ પર બે વાર મેસેજ કર્યા હતા, જેમાં તેણે તેના સંબંધીઓ દ્વારા મારી નાખવાની અથવા બીજા કોઈ સાથે લગ્ન કરવાની ધમકી આપી હતી.’
યુવકના જણાવ્યા મુજબ ‘જ્યારે છોકરીએ મને આ મેસેજ મોકલ્યા ત્યારે હું તે વાંચી શક્યો નહીં કારણ કે હું તે સમયે જેલમાં હતો.’ આ પછી તેણે તેના વકીલ દ્વારા ગુજરાત હાઇકોર્ટમાં હેબિયસ કોર્પસ અરજી દાખલ કરી જેમાં છોકરીને કોર્ટમાં રજૂ કરવાની માંગ કરી. જોકે સુનાવણીના બે દિવસ પહેલા, 25 જૂને, યુવકને ખબર પડી કે છોકરીનું મૃત્યુ થઈ ગયું છે.
આ પછી Gujaratના મુખ્યમંત્રી ભૂપેન્દ્ર પટેલ અને રાજ્ય માનવાધિકાર આયોગને કરેલી ફરિયાદમાં યુવકે છોકરીના સંબંધીઓ પર તેની હત્યાનો શંકા વ્યક્ત કરી હતી અને કહ્યું હતું કે પરિવારે પોલીસને જાણ કર્યા વિના કે પોસ્ટમોર્ટમ કર્યા વિના છોકરીનો અગ્નિસંસ્કાર પણ કર્યો હતો.
27 જૂનના રોજ જ્યારે હેબિયસ કોર્પસ અરજી હાઇકોર્ટમાં સુનાવણી માટે આવી, ત્યારે હાઇકોર્ટને જાણ કરવામાં આવી કે જે છોકરી માટે અરજી દાખલ કરવામાં આવી હતી તેનું મૃત્યુ થયું છે. આ પછી ન્યાયાધીશ વૈભવી નાણાવટીની બેન્ચે છોકરીના મૃત્યુ પ્રમાણપત્રને રેકોર્ડ પર લીધા પછી અરજીનો નિકાલ કર્યો.
પોતાની ફરિયાદમાં યુવકે તેની મૃત પ્રેમિકાના પરિવાર, તેના પિતા અને કાકા તેમજ તેમને મદદ કરનારા પોલીસકર્મીઓ સામે કાર્યવાહી કરવાની માંગ કરી હતી. હવે પોલીસે છોકરીના મૃત્યુ કેસની તપાસ શરૂ કરી છે.