Gujarat News: ગુજરાતની સીબીઆઈ સ્પેશિયલ કોર્ટે સોમવારે 23 વર્ષ જૂના પેપર લીક કેસમાં દોષિત ઠેરવવામાં આવેલા 8 ભૂતપૂર્વ રેલવે અધિકારીઓને 5 વર્ષની જેલની સજા ફટકારી છે. આ સાથે કોર્ટે દરેક દોષિતને 5 લાખ રૂપિયાનો દંડ પણ ફટકાર્યો છે.
આ બધા દોષિત ભૂતપૂર્વ અધિકારીઓ પર રેલવે દ્વારા પ્રોબેશનરી આસિસ્ટન્ટ સ્ટેશન માસ્ટરની પોસ્ટ માટે લેવામાં આવેલી પરીક્ષાનું પ્રશ્નપત્ર લીક કરવાનો આરોપ હતો. રેલવે અધિકારીઓની સંડોવણીને કારણે આ કેસ પણ હેડલાઇન્સમાં રહ્યો હતો.
સીબીઆઈએ ઓગસ્ટ 2002માં કેસ નોંધ્યો હતો
પશ્ચિમ રેલવે અમદાવાદના તત્કાલીન ચીફ વિજિલન્સ ઇન્સ્પેક્ટર દ્વારા ફરિયાદ દાખલ કરવામાં આવ્યા બાદ સેન્ટ્રલ બ્યુરો ઓફ ઇન્વેસ્ટિગેશન (સીબીઆઈ) એ 17 ઓગસ્ટ, 2002ના રોજ તત્કાલીન રેલવે અધિકારીઓ સામે કેસ નોંધ્યો હતો.
ઉમેદવારો પાસેથી 50,000 થી 1 લાખ રૂપિયા વસૂલવામાં આવ્યા
સીબીઆઈએ એક નિવેદનમાં જણાવ્યું હતું કે આરોપીઓએ પરીક્ષાનું પ્રશ્નપત્ર લીક કર્યું હતું અને ૧૮ ઓગસ્ટ, ૨૦૦૨ ના રોજ પ્રોબેશનરી આસિસ્ટન્ટ સ્ટેશન માસ્ટરની પોસ્ટ માટે લેખિત પરીક્ષા આપનારા ઉમેદવારો પાસેથી 50,000 થી 1 લાખ રૂપિયા સુધીના પૈસા વસૂલ્યા હતા.
આ આઠ અધિકારીઓ અમદાવાદ, વડોદરા અને આણંદમાં તૈનાત હતા. બીજો આરોપી એક ખાનગી વ્યક્તિ હતો જેનું ટ્રાયલ દરમિયાન મૃત્યુ થયું હતું. ૨૮ જુલાઈ, ૨૦૦૩ ના રોજ સીબીઆઈ દ્વારા નવ આરોપીઓ સામે ચાર્જશીટ દાખલ કરવામાં આવી હતી.