Pahalgam terror Attack બાદ PM મોદી એક્શન મોડમાં, એરપોર્ટ પર જ યોજી ઇમરજન્સી બેઠક, કહ્યું જડબાતોડ જવાબ આપવામાં આવશે…

Pahalgam terror Attack: પહલગામ હુમલાને લઈને PM મોદી એક્શન મોડમાં હોય તેવું લાગી રહ્યું છે. આ હુમલાના સમાચાર મળતાં જ તેઓ સાઉદી અરેબિયાનો પ્રવાસ અધવચ્ચે જ છોડીને ઘરે પરત ફર્યા હતા. તેમનું વિમાન બુધવારે સવારે દિલ્હી એરપોર્ટ પર ઉતર્યું હતું. મામલાની ગંભીરતાને સમજીને PM મોદીએ કોઈ પણ સમય બગાડ્યા વિના એરપોર્ટ પર ઉચ્ચ સ્તરીય બેઠક યોજી હતી. આ બેઠકમાં સુરક્ષા એજન્સીઓના વરિષ્ઠ અધિકારીઓની સાથે NSA અજીત ડોભાલ અને વિદેશ મંત્રી એસ જયશંકર પણ હાજર હતા. સૂત્રોના જણાવ્યા અનુસાર PM મોદીએ કહ્યું છે કે આ હુમલામાં સામેલ આતંકવાદીઓને જડબાતોડ જવાબ આપવામાં આવશે અને તેમને સમર્થન કરનારાઓ સામે કડક કાર્યવાહી કરવામાં આવશે.

તમને જણાવી દઈએ કે PM મોદીએ આ હુમલાને લઈને મંગળવારે સાંજે ઈન્સ્ટાગ્રામ પર પોસ્ટ પણ કરી હતી. તેણે લખ્યું હતું કે હું જમ્મુ-કાશ્મીરના પહલગામમાં થયેલા આતંકવાદી હુમલાની સખત નિંદા કરું છું. જેમણે પોતાના પ્રિયજનોને ગુમાવ્યા છે તેમના પ્રત્યે મારી સંવેદના. હું પ્રાર્થના કરું છું કે ઘાયલ લોકો જલદી સાજા થઈ જાય. અસરગ્રસ્તોને તમામ શક્ય મદદ પૂરી પાડવામાં આવી રહી છે. આ ઘૃણાસ્પદ કૃત્ય પાછળ જેઓ છે તેમને ન્યાય આપવામાં આવશે. તેઓ બક્ષવામાં આવશે નહીં! તેમનો નાપાક એજન્ડા ક્યારેય સફળ નહીં થાય. આતંકવાદ સામે લડવાનો અમારો સંકલ્પ મક્કમ છે અને તે વધુ મજબૂત બનશે.

જમ્મુ-કાશ્મીરના પહલગામમાં પ્રવાસીઓ પર થયેલા આતંકી હુમલા બાદ PM મોદીએ ગૃહમંત્રી અમિત શાહ સાથે પણ વાત કરી હતી. પીએમ મોદીએ અમિત શાહને પરિસ્થિતિનો સામનો કરવા માટે તમામ યોગ્ય પગલાં ભરવા જણાવ્યું હતું. પીએમ મોદીએ શાહને કેન્દ્રશાસિત પ્રદેશની મુલાકાત લેવા કહ્યું. અમિત શાહ શ્રીનગર જવા રવાના થયા છે. આતંકવાદીઓએ મંગળવારે દક્ષિણ કાશ્મીરના અનંતનાગ જિલ્લાના મુખ્ય પ્રવાસન સ્થળ પહેલગામ પર હુમલો કર્યો હતો. જમ્મુ-કાશ્મીરના મુખ્યમંત્રી ઉમર અબ્દુલ્લાએ કહ્યું હતું કે મૃતકોની સંખ્યા નક્કી કરવામાં આવી રહી છે. તેણે ‘X’ પર એક પોસ્ટમાં કહ્યું હતું કે આ હુમલો તાજેતરના વર્ષોમાં નાગરિકો પરના કોઈપણ હુમલા કરતા ઘણો મોટો છે.