Ahmedabadના સરખેજમાં એક સ્કોર્પિયો કાર ફતેહવાડી કેનાલમાં પડી હતી. જ્યારે કાર કેનાલમાં પડી ત્યારે તેની અંદર ત્રણ યુવકો હાજર હતા. કેનાલમાં ડૂબી ગયેલા ત્રણ યુવાનોની શોધખોળ ચાલુ છે. કહેવામાં આવી રહ્યું છે કે રીલ બનાવતી વખતે સ્કોર્પિયો કાર બેકાબૂ થઈ ગઈ અને નહેરમાં પડી ગઈ.
સ્કોર્પિયો કેનાલમાં પડી જતાં જ ત્યાં હાજર અન્ય મિત્રોએ દોરડું ફેંકીને ત્રણેય યુવકોને બચાવવાનો પ્રયાસ કર્યો હતો પરંતુ નિષ્ફળ ગયો હતો. જે બાદ આસપાસના સ્થાનિક લોકો ઘટનાસ્થળે એકત્ર થઈ ગયા હતા. સ્કોર્પિયો કાર કેનાલમાં પડી અને ત્રણ યુવાનો ડૂબી ગયાની માહિતી ફાયર બ્રિગેડ અને પોલીસને આપવામાં આવી હતી અને રેસ્ક્યુ માટે સરખેજની ફતેહવાડી કેનાલમાં પહોંચેલા ફાયર બ્રિગેડના કર્મચારીઓએ સ્કોર્પિયો કારને બહાર કાઢી કારમાં હાજર ત્રણેય યુવકોની શોધખોળ શરૂ કરી હતી.
અમદાવાદના એચ ડિવિઝન ટ્રાફિક પોલીસ દ્વારા આપવામાં આવેલી માહિતી મુજબ સાંજે સાડા ચાર વાગ્યાના સુમારે સ્કોર્પિયો કાર નંબર GJ 01 WU 3214ને હૃદય, ધ્રુવ અને રિતાયુએ 4 કલાક માટે 3500 રૂપિયા આપીને રીલ બનાવવા માટે રોકી હતી. ત્રણેય સ્કોર્પિયો કારમાં વાસણા બેરેજ પહોંચ્યા ત્યારે તેમના ચાર મિત્રો વિરાજસિંહ, યક્ષ, યશ અને ક્રિશ ત્યાં પહેલેથી જ હાજર હતા.
પોલીસના જણાવ્યા અનુસાર યક્ષે વાસણા બેરેજ કેનાલ રોડ પરથી સ્કોર્પિયો ચલાવી હતી અને થોડે દૂર ગયા બાદ તેના મિત્ર યશ સોલંકીને ગાડી ચલાવવા માટે આપી હતી. આ દરમિયાન ક્રિશ પણ કારમાં હાજર હતો. રીલ્સ બનાવવા માટે સ્કોર્પિયો ભાડે લેવામાં આવી હતી, તેથી રીલ્સ બનાવવાનું કામ પણ ચાલુ હતું. સીસીટીવી ફૂટેજમાં જોઈ શકાય છે કે એક સ્કોર્પિયો કાર રોડની વચ્ચે પાર્ક કરેલી છે. તે સમયે કારમાં યક્ષ, યશ અને ક્રિશ હાજર હતા. કાર અચાનક બેકાબુ થઈ ગઈ અને આગળ કેનાલમાં પડી. આ પછી ત્યાં હાજર ત્રણેય યુવકોના મિત્ર વિરાજસિંહ રાઠોડે દોરડાની મદદથી તેના મિત્રોને બચાવવાનો પ્રયાસ કર્યો હતો. પરંતુ ત્રણેય મિત્રોમાંથી કોઈ પણ દોરડું પકડી શક્યું ન હતું અને પાણીના જોરદાર પ્રવાહમાં તણાઈ ગયા હતા.
હાલમાં કેનાલમાં પડી ગયેલી સ્કોર્પિયો કારને ફાયર બ્રિગેડના કર્મચારીઓ દ્વારા બહાર કાઢવામાં આવી છે અને કેનાલમાં પડી ત્યારે સ્કોર્પિયોમાં હાજર યક્ષ, યશ અને ક્રિશની શોધખોળ ચાલુ છે.