Banaskanthaના સાંસદ ગેની ઠાકોરે જિલ્લા પોલીસ અને સરકાર પર કર્યા ગંભીર આક્ષેપો, સંસદમાં ઉઠાવ્યો આંતરરાષ્ટ્રીય કોલ સેન્ટરનો મુદ્દો

Banaskantha લોકસભા બેઠકના કોંગ્રેસના સાંસદ ગેની ઠાકોરે લોકસભામાં બનાસકાંઠા જિલ્લાના વાવ તાલુકામાં પકડાયેલા ઈન્ટરનેશનલ કોલ સેન્ટરનો મુદ્દો ઉઠાવ્યો હતો.

તેમણે રાષ્ટ્રીય તપાસ એજન્સી દ્વારા નિષ્પક્ષ તપાસ કરીને આ મામલે સત્ય બહાર લાવવા અંગે સંસદમાં પોતાના વિચારો વ્યક્ત કર્યા હતા. તેમજ સદનમાં આ મુદ્દે મંત્રીને જાણ કરી હતી.

તેમણે કહ્યું કે બનાસકાંઠામાં સાયબર ક્રાઈમની ટીમના દરોડામાં ઈન્ટરનેશનલ કોલ સેન્ટર ઝડપાયું છે. આ કોલ સેન્ટરના મકાન માલિક ભાજપના અધિકારી છે. પોલીસ પ્રશાસન તેની સામે કાર્યવાહી કરવાને બદલે તેને બચાવવામાં વ્યસ્ત છે. સરકાર પારદર્શિતાની વાત કરી રહી છે પરંતુ દરોડા દરમિયાન પત્રકારોને પણ કોલ સેન્ટરમાં પ્રવેશવા દેતી નથી અને તેમને રોકવામાં આવી રહ્યા છે.

ઉલ્લેખનીય છે કે કચ્છ જિલ્લાની ભુજ સાયબર ક્રાઈમ ટીમે ભારત-પાકિસ્તાનની આંતરરાષ્ટ્રીય સરહદ નજીક બનાસકાંઠા જિલ્લાના વાવમાં ભાડાના મકાનમાં ચાલતા ઈન્ટરનેશનલ કોલ સેન્ટરનો પર્દાફાશ કરતા 16 આરોપીઓની ધરપકડ કરી હતી. વાવના દીપસરા વિસ્તારમાં આવેલું આ મકાન વાવ સરપંચ દિવાળીબેન સોઢાના પરિવારનું હોવાનું કહેવાય છે. સરપંચનો પરિવાર ખેતરમાં રહે છે. આ અંગે વિસ્તારના ભરતસિંહ વેજિયાએ ફરિયાદ કરી હતી.