Ceremony In Maharashtra : BJP ધારાસભ્યની બેઠકને લઈને મોટા સમાચાર, આ હોઈ શકે છે સરકાર બનાવવાની ફોર્મ્યુલા.

Ceremony In Maharashtra : સૂત્રોના જણાવ્યા અનુસાર એક તારીખે બીજેપીના ધારાસભ્ય દળની બેઠક યોજાઈ શકે છે. બેઠકમાં દેવેન્દ્ર ફડણવીસના નામને મંજૂરી મળી શકે છે.

મહારાષ્ટ્રમાં મહાગઠબંધન સરકારની ફોર્મ્યુલા લગભગ તૈયાર છે. સુત્રો પાસેથી મળેલી માહિતી મુજબ 1 ડિસેમ્બરે બીજેપી ધારાસભ્ય દળની બેઠક યોજાઈ શકે છે. આ બેઠકમાં ભાજપ ધારાસભ્ય દળના નેતાની પસંદગી કરવામાં આવશે. બેઠકમાં દેવેન્દ્ર ફડણવીસના નામને મંજૂરી મળી શકે છે. સૂત્રોના જણાવ્યા અનુસાર મુખ્યમંત્રી પદની રેસમાં દેવેન્દ્ર ફડણવીસનું નામ લગભગ ફાઈનલ થઈ ગયું છે. સરકારની રચનામાં એક સીએમ અને બે ડેપ્યુટી સીએમની ફોર્મ્યુલા તૈયાર કરવામાં આવી છે.

5મી ડિસેમ્બરે શપથવિધિ સંભવ છે

સૂત્રોના જણાવ્યા અનુસાર મહારાષ્ટ્રની નવી સરકારનો શપથ ગ્રહણ સમારોહ 5 ડિસેમ્બરે યોજાઈ શકે છે. શપથ ગ્રહણ સમારોહ આઝાદ મેદાનમાં યોજાય તેવી શક્યતા છે. તેમાં ભાજપના મોટા નેતાઓ અને એનડીએ શાસિત રાજ્યોના મુખ્યમંત્રીઓ અને ડેપ્યુટી સીએમ સામેલ થઈ શકે છે. કહેવામાં આવી રહ્યું છે કે દેવેન્દ્ર ફડણવીસ મુખ્યમંત્રી અને એકનાથ શિંદે અને અજિત પવાર ડેપ્યુટી સીએમ તરીકે શપથ લઈ શકે છે.

સરકાર બનાવવાની આ ફોર્મ્યુલા હોઈ શકે છે

સૂત્રો પાસેથી મળેલી માહિતી મુજબ મહાગઠબંધન સરકારમાં ભાજપ પાસે 17 કેબિનેટ મંત્રીઓ હોઈ શકે છે. ભાજપ કેબિનેટમાં 50 ટકા નવા અને 50 ટકા જૂના ચહેરાઓને તક આપી શકે છે. એકનાથ શિંદે જૂથમાંથી 9 કેબિનેટ મંત્રીઓ હોઈ શકે છે. અજિત પવારના જૂથમાંથી 7 કેબિનેટ મંત્રી બનાવવામાં આવી શકે છે.

મહાયુતિની બેઠક રદ્દ, શિંદે સતારા જવા રવાના

તમને જણાવી દઈએ કે મહારાષ્ટ્રના મુખ્યપ્રધાનના નામની જાહેરાતને લઈને ચાલી રહેલા સસ્પેન્સ વચ્ચે એકનાથ શિંદેએ બે મહત્વપૂર્ણ બેઠકો રદ્દ કરી દીધી છે અને સૂત્રોનું માનીએ તો તેઓ તેમના ગામ સતારા જવા રવાના થઈ ગયા છે. શિંદે, દેવેન્દ્ર ફડણવીસ અને અજિત પવાર સાથે, ગુરુવારે મોડી રાત્રે અમિત શાહ અને જોપી નડ્ડા સાથે મહારાષ્ટ્રમાં આગામી સરકારને લઈને મળ્યા હતા જ્યારે ભાજપની આગેવાની હેઠળના ગઠબંધનને વિધાનસભાની ચૂંટણીમાં પ્રચંડ બહુમતી મળી હતી.

ભાજપ ધારાસભ્ય દળ બાદ મહાયુતિ ધારાસભ્ય દળની બેઠક યોજાશે

એકનાથ શિંદેએ શુક્રવારે કહ્યું હતું કે ગુરુવારે રાત્રે રાજ્યમાં સરકારની રચનાના મુદ્દે કેન્દ્રીય ગૃહ પ્રધાન અમિત શાહ અને ભાજપના વડા જેપી નડ્ડા સાથે સારી અને સકારાત્મક ચર્ચા થઈ હતી. સૂત્રોના જણાવ્યા અનુસાર પહેલા બીજેપી વિધાયક દળની બેઠક થશે જ્યાં તેના નેતાની પસંદગી કરવામાં આવશે અને ત્યારબાદ મહાયુતિ ગઠબંધનની સંયુક્ત બેઠક થશે.