BRICS Summit : રશિયા અને યુક્રેન વચ્ચે યુદ્ધ ચાલુ છે. યુદ્ધની વચ્ચે અમેરિકાના રક્ષા મંત્રી લોયડ ઓસ્ટિન યુક્રેનની રાજધાની કિવ પહોંચી ગયા છે. દરમિયાન, લોયડ ઓસ્ટીને કહ્યું છે કે આંતરરાષ્ટ્રીય સમુદાય યુક્રેનની સાથે છે.
એક તરફ રશિયા બ્રિક્સ સમિટની તૈયારીમાં વ્યસ્ત છે તો બીજી તરફ અમેરિકાના રક્ષા મંત્રી લોયડ ઓસ્ટિન યુક્રેનની મુલાકાતે કિવ પહોંચી ગયા છે. ઓસ્ટિન એવા સમયે કિવ પહોંચ્યા છે જ્યારે રશિયા યુક્રેનમાં સતત ડ્રોન હુમલા કરી રહ્યું છે. યુદ્ધની વચ્ચે, યુક્રેનના રાષ્ટ્રપતિ વોલોડીમિર ઝેલેન્સકીએ પશ્ચિમી ભાગીદારોને યુદ્ધ માટે લશ્કરી સમર્થન આપવાનું ચાલુ રાખવા હાકલ કરી છે. હાલમાં રશિયા અને યુક્રેન બંને એકબીજા પર હુમલા કરી રહ્યા છે. તાજેતરના સમયમાં રશિયાનું વલણ આક્રમક રહ્યું છે.
‘આંતરરાષ્ટ્રીય સમુદાય યુક્રેનની સાથે છે’
તેમની મુલાકાત અંગે અમેરિકી રક્ષા મંત્રી લોયડ ઓસ્ટીને સોશિયલ મીડિયા સાઈટ ‘X’ પર કહ્યું કે તેમની ચોથી મુલાકાત દર્શાવે છે કે ‘અમેરિકા તેમજ આંતરરાષ્ટ્રીય સમુદાય યુક્રેનની સાથે ઉભો છે.’
બીજા વિશ્વયુદ્ધ પછીનો સૌથી મોટો સંઘર્ષ
રાષ્ટ્રપતિ ઝેલેન્સ્કી લગભગ ત્રણ વર્ષના યુદ્ધને સમાપ્ત કરવા માટે તેમની કહેવાતી વિજય યોજનાને સમર્થન આપવા પશ્ચિમી સાથીઓને વિનંતી કરી રહ્યા છે. બીજા વિશ્વયુદ્ધ પછી તે યુરોપનો સૌથી મોટો સંઘર્ષ છે અને તેમાં બંને પક્ષે હજારો લોકોના જીવ ગયા છે.
ઝેલેન્સકીએ શું કહ્યું?
રાષ્ટ્રપતિ વોલોડીમિર ઝેલેન્સકીએ રવિવારે સાંજે એક વિડીયો સંબોધનમાં જણાવ્યું હતું કે ફ્રાન્સ, લિથુઆનિયા, નોર્ડિક દેશો અને EU માં “અન્ય ઘણા સાથીઓએ” તેમની યોજનાને ટેકો આપ્યો હતો. જો કે, સૌથી મહત્વપૂર્ણ દેશ યુએસ છે, જે યુક્રેનનો સૌથી મોટો સૈન્ય સપ્લાયર છે.
યુક્રેનને અમેરિકાની મદદ મળી રહી છે
અહીં તમને એ પણ જણાવી દઈએ કે અમેરિકા ફરી એકવાર યુક્રેનની મદદ માટે આગળ આવ્યું છે. રાષ્ટ્રપતિ જો બિડેને કિવ માટે $425 મિલિયનના હથિયાર પેકેજની જાહેરાત કરી છે. આ પેકેજમાં એર ડિફેન્સ સિસ્ટમ, બખ્તરબંધ વાહનો અને અન્ય હથિયારોનો સમાવેશ થાય છે. બિડેન નવેમ્બરમાં યુક્રેનના સાથીઓની વર્ચ્યુઅલ મીટિંગ પણ કરશે.